اسلام آباد ہائیکورٹ نے بانی پی ٹی آئی عمران خان کو علاج کے لیے اڈیالہ جیل سے اسپتال منتقل کرنے کی درخواست پر نوٹس جاری کر دیا۔ عدالت نے بانی پی ٹی آئی کی درخواست پر عائد اعتراضات دور کرتے ہوئے رجسٹرار آفس کو نمبر لگا کر دس مارچ کو سماعت کے لیے مقرر کرنے کی ہدائت کر دی
اسلام آباد ہائیکورٹ کے جسٹس ارباب محمد طاہر اور جسٹس خادم حسین سومرو پر مشتمل ڈویژن بینچ نے بانی پی ٹی آئی عمران خان کی توشہ خانہ فوجداری کیس میں سزا کے خلاف اپیل میں متفرق درخواست پر رجسٹرار آفس کے اعتراضات کے ساتھ سماعت کی اور دوران سماعت اعتراضات دور کر دیے۔ عدالت نے کہا مرکزی اپیل کیوں نہ سنی جائے؟ سردار لطیف کھوسہ نے کہا بانی پی ٹی آئی کی صحت کا بھی معاملہ ہے۔ جسٹس ارباب محمد طاہر نے کہا ہم اپیل اور آپ کی درخواست دونوں سُن لیتے ہیں، ہم آپ کی اپیل پر فیصلہ کریں گے۔ جسٹس خادم حسین سومرو نے کہا 2023 کی اپیلیں ہیں لیکن پیپر بک تیار نہیں۔ سردار لطیف کھوسہ نے استدعا کی کہ بانی پی ٹی آئی کی جیل سے اسپتال منتقلی کی درخواست پر تاخیر مت ہونے دیں وہ کل ہی لگا لیں اور بانی پی ٹی آئی سے ملاقات کرانے کا آرڈر بھی جاری کیا جائے۔
جسٹس ارباب طاہر نے کہا آپ نے یہ استدعا اپنی متفرق درخواست میں کی ہے، ہم نے آپکی متفرق درخواست پر نوٹس جاری کر دیا ہے۔ پیپر بک تیار ہونے میں دو تین دن لگ جائیں گے، مرکزی اپیل آئندہ ہفتے سماعت کے لیے مقرر کر رہے ہیں، آئندہ سماعت پر تیاری کے ساتھ آئیں