کراچی کے علاقے فقیرا گوٹھ میں دل دہلا دینے والا واقعہ پیش آیا جہاں گزشتہ شام لاپتہ ہونے والا تین سالہ بچہ احسن مردہ حالت میں قریبی مین ہول سے مل گیا۔
اہل خانہ کے مطابق احسن شام چھ بجے کے قریب گھر کے باہر دیگر بچوں کے ساتھ کھیلنے نکلا تھا اور اچانک لاپتہ ہو گیا۔ اہل محلہ اور گھر والوں نے کافی تلاش کے بعد قریبی مین ہول میں بچے کی لاش دیکھی جس سے کہرام مچ گیا۔
احسن کے چچا کا کہنا ہے کہ بچے کی گمشدگی کے بعد فوری تلاش شروع کی گئی تھی، تاہم کچھ ہی فاصلے پر اس کی لاش ملنے سے سب صدمے میں ہیں۔
واقعے کے بعد ورثا نے بچے کی لاش اسپتال منتقل کرنے سے انکار کر دیا اور شدید غم و غصے کا اظہار کرتے ہوئے ذمہ داران کے خلاف کارروائی اور انصاف کا مطالبہ کیا ہے۔
یہ افسوسناک واقعہ شہری علاقوں میں کھلے مین ہولز اور ناقص حفاظتی انتظامات کی سنگین غفلت کو ایک بار پھر بے نقاب کرتا ہے، جس کے باعث معصوم جانیں ضائع ہو رہی ہیں۔
کراچی میں لاپتہ بچہ مین ہول سے مردہ ملا
