بنوں پولیس کی کامیاب کارروائی، افغان مہاجرین کو پاکستانی خاندانوں کا حصہ بنا کر جعلی شناختی کارڈز بنانے والا گروہ گرفتار کر لیا گیا.
کامیاب کارروائی ڈی پی او بنوں یاسر آفریدی کو ملنے والی مصدقہ اطلاع پر عمل میں لائی گئی۔ایس پی سٹی توحید خان اور ایس ایچ او تھانہ سٹی ریاض خان نے پولیس ٹیم کے ہمراہ مؤثر کارروائی کرتے ہوئے تین ملزمان کو گرفتار کر لیا۔گرفتار ملزمان کی شناخت اجمل ولد عبد الرزاق اور بادشاہ خان ولد لاہور خان کے نام سے ہوئی جو افغان شہری نقیب شاہ ولد زرکلام شاہ کے ساتھ رنگے ہاتھوں گرفتار ہوئے،گرفتار افغانی شہری صوبہ خوست کا رہائشی ہے جس نے چمن بارڈر سے دراندازی کے بعد بنوں تک چھپتے چھپاتے سفر کیا۔گرفتار افغانی شہری نے اعتراف کیا ہے کہ اس کے والد نے گروہ کے مفرور ارکان مامور سکنہ کوئٹہ اور زین اللہ سکنہ میرانشاہ سے 28 لاکھ روپے میں پاکستانی شناختی کارڈز اور دیگر دستاویزات کا سودہ کیا ۔گرفتار ملزمان نے ابتدائی تفتیش میں افغان باشندوں کو پاکستانی خاندانوں میں شامل کروانے کا اعتراف کیا ہے،افغان باشندے کی شمولیت پر متعلقہ خاندان کو 2 لاکھ روپے فی افغانی معاوضہ ادا کیا جاتا تھا،ملزمان سے مزید تفتیش جاری ہے جبکہ گروپ کے دیگر مفرور ارکان کی گرفتاری کیلئے چھاپے مارے جا رہے ہیں۔