کراچی کے علاقے منگھوپیر روڈ پر واقع ایک نجی بینک میں ڈکیتی کی واردات پیش آئی، جہاں مسلح ملزمان لاکھوں روپے لوٹ کر فرار ہو گئے۔
پولیس حکام کے مطابق تین مسلح افراد بینک کے اندر داخل ہوئے جبکہ ان کے دو ساتھی باہر موجود تھے۔ ملزمان نے داخل ہوتے ہی سیکیورٹی گارڈ کو قابو کیا اور اس سے پستول اور رائفل چھین لی۔
ڈی آئی جی کے مطابق ملزمان بینک سے تقریباً 40 سے 50 لاکھ روپے نقدی لوٹ کر فرار ہوئے۔ واردات کے بعد انہوں نے بینک کا دروازہ باہر سے موٹر سائیکل کے تار والے لاک سے بند کر دیا، جس کے باعث فوری تعاقب ممکن نہ ہو سکا۔
واقعے کے بعد پولیس اور قانون نافذ کرنے والے ادارے حرکت میں آ گئے ہیں اور ملزمان کی تلاش کے لیے مختلف علاقوں میں چھاپے مارے جا رہے ہیں۔
پولیس کا کہنا ہے کہ بینک کے سی سی ٹی وی فوٹیج حاصل کر لیے گئے ہیں اور ملزمان کی شناخت کے لیے تحقیقات جاری ہیں۔
شہریوں نے شہر میں بڑھتی ہوئی ڈکیتی کی وارداتوں پر تشویش کا اظہار کرتے ہوئے سیکیورٹی مزید سخت کرنے کا مطالبہ کیا ہے۔