ڈھاکہ میں وفاقی وزیر داخلہ محسن نقوی کی بنگلہ دیش کی وزیر مملکت برائے خارجہ امور شمع عبید اسلام سے اہم ملاقات ہوئی، جس میں دوطرفہ تعلقات، خطے کی مجموعی صورتحال اور پاکستان کے مصالحتی کردار پر تفصیلی تبادلہ خیال کیا گیا۔
ملاقات کے دوران بنگلہ دیش کی وزیر مملکت برائے خارجہ نے ایران اور امریکہ کے درمیان تنازع کے حل کے لیے پاکستان کے مثبت اور مصالحتی کردار کو سراہتے ہوئے کہا کہ خطے میں امن و استحکام کے لیے پاکستان کی سفارتی کوششیں قابل قدر ہیں۔دونوں رہنماؤں نے تجارت، بزنس اور ثقافت کے شعبوں میں تعاون کو مزید وسعت دینے پر اتفاق کیا۔ اس موقع پر اس بات پر بھی زور دیا گیا کہ تجارتی و ثقافتی تعلقات کے فروغ کے لیے دونوں ممالک کے درمیان وفود کے زیادہ سے زیادہ تبادلے ہونے چاہئیں تاکہ باہمی روابط کو مزید مضبوط بنایا جا سکے۔
ملاقات میں بنگلہ دیش کے وزیر خارجہ کے متوقع دورۂ پاکستان پر بھی گفتگو کی گئی اور دونوں ممالک کے درمیان اعلیٰ سطحی روابط جاری رکھنے کی ضرورت پر اتفاق کیا گیا۔وفاقی وزیر داخلہ محسن نقوی نے کہا کہ پاکستان میں سرمایہ کاری کے وسیع مواقع موجود ہیں اور بنگلہ دیشی سرمایہ کار مختلف شعبوں میں سرمایہ کاری سے فائدہ اٹھا سکتے ہیں۔ انہوں نے کہا کہ پاکستان خطے میں اقتصادی تعاون اور مشترکہ ترقی کے فروغ کے لیے پرعزم ہے۔