پاکستان کرکٹ ٹیم کے اسٹار فاسٹ بولر شاہین شاہ آفریدی نے ایک اور بڑا اعزاز اپنے نام کر لیا ہے۔ بنگلہ دیش کے خلاف ڈھاکا میں کھیلے جانے والے ٹیسٹ میچ میں شاندار بولنگ کا مظاہرہ کرتے ہوئے انہوں نے بین الاقوامی کرکٹ میں اپنی 400 وکٹیں مکمل کر لیں۔
26 سالہ قومی پیسر نے میچ کی پہلی اننگز میں تین وکٹیں حاصل کرکے یہ اہم سنگ میل عبور کیا۔ اس کامیابی کے بعد وہ پاکستان کے ان چند بولرز کی فہرست میں شامل ہو گئے ہیں جنہوں نے انٹرنیشنل کرکٹ میں 400 یا اس سے زائد وکٹیں حاصل کی ہیں۔
شاہین آفریدی نے صرف 211 اننگز میں یہ کارنامہ انجام دیا، جسے ان کے کیریئر کی بڑی کامیابی قرار دیا جا رہا ہے۔ وہ پاکستان کے پانچویں فاسٹ بولر اور مجموعی طور پر نویں پاکستانی بولر ہیں جنہوں نے 400 انٹرنیشنل وکٹیں مکمل کیں۔
کرکٹ ماہرین کے مطابق کم عمر میں اس سنگ میل کا عبور کرنا اس بات کی علامت ہے کہ شاہین آفریدی مستقبل میں پاکستان کے کامیاب ترین بولرز میں شامل ہو سکتے ہیں۔ ان کی تیز رفتار بولنگ، سوئنگ اور نئی گیند کے ساتھ خطرناک اسپیلز نے انہیں دنیا کے بہترین فاسٹ بولرز میں شامل کر دیا ہے۔
پاکستان کی جانب سے سب سے زیادہ بین الاقوامی وکٹیں لینے کا اعزاز لیجنڈری فاسٹ بولر وسیم اکرم کے پاس ہے، جنہوں نے اپنے شاندار کیریئر میں 916 وکٹیں حاصل کیں۔ اس فہرست میں وقار یونس 789 وکٹوں کے ساتھ دوسرے جبکہ عمران خان 544 وکٹوں کے ساتھ تیسرے نمبر پر موجود ہیں۔
پاکستان کے نمایاں بولرز کی فہرست میں شاہد آفریدی، ثقلین مشتاق، سعید اجمل، شعیب اختر اور عمر گل جیسے بڑے نام بھی شامل ہیں۔ اب شاہین آفریدی نے بھی 400 وکٹوں کے ہندسے کو عبور کرکے اپنے نام کو پاکستانی کرکٹ کی تاریخ میں نمایاں کر لیا ہے۔
شائقینِ کرکٹ اور سابق کھلاڑیوں نے شاہین آفریدی کو اس کامیابی پر مبارکباد دیتے ہوئے امید ظاہر کی ہے کہ وہ مستقبل میں مزید ریکارڈز اپنے نام کریں گے۔
شاہین آفریدی 400 وکٹیں مکمل کرنے والے پاکستانی ایلیٹ بولرز میں شامل
