ڈپٹی کمشنر لاہور کیپٹن (ر) محمد علی اعجاز نے لاہور کی مارکیٹوں اور کاروباری مراکز کے اوقات کار میں یکم جون تک نرمی کا اعلان کر دیا ہے، جس کے تحت دکانیں، مالز اور مارکیٹس رات 10 بجے تک کھلی رکھی جا سکیں گی۔
ڈی سی لاہور نے اپنے پیغام میں کہا کہ نئے اوقات کار کا اطلاق فوری طور پر کر دیا گیا ہے تاکہ بڑی عید سے قبل تاجروں اور شہریوں کو زیادہ سے زیادہ سہولت فراہم کی جا سکے۔
حکام کے مطابق پہلے کاروباری مراکز کو رات 8 بجے بند کرنے کی پابندی تھی، تاہم تاجر برادری کے دیرینہ مطالبے پر اس فیصلے میں نرمی کرتے ہوئے کاروباری اوقات میں توسیع کی گئی ہے۔
ڈی سی لاہور کا کہنا ہے کہ اس اقدام کا مقصد معاشی سرگرمیوں کو مزید فعال بنانا اور عیدالاضحیٰ سے قبل خریداری کیلئے شہریوں کو بہتر سہولت دینا ہے۔
انہوں نے تمام متعلقہ اداروں اور انتظامیہ کو ہدایت کی ہے کہ مارکیٹوں کے نئے اوقات کار کے فیصلے پر فوری عملدرآمد یقینی بنایا جائے۔
تاجر تنظیموں نے پنجاب حکومت اور ضلعی انتظامیہ کے اس فیصلے کا خیر مقدم کرتے ہوئے کہا ہے کہ اوقات کار میں توسیع سے کاروباری سرگرمیوں میں اضافہ ہوگا اور تاجروں کو عید سیزن میں بہتر کاروبار کا موقع ملے گا۔
شہریوں کی جانب سے بھی فیصلے کو خوش آئند قرار دیا جا رہا ہے کیونکہ گرمی کے موسم میں زیادہ تر لوگ رات کے اوقات میں خریداری کو ترجیح دیتے ہیں۔
ضلعی انتظامیہ کے مطابق یکم جون تک مارکیٹس، مالز اور کاروباری مراکز رات 10 بجے تک کھلے رہ سکیں گے، جبکہ سیکیورٹی اور ٹریفک انتظامات کو بھی مزید بہتر بنانے کی ہدایات جاری کر دی گئی ہیں۔
لاہور میں مارکیٹوں کے اوقات کار میں یکم جون تک نرمی
