افریقی جزائر سیشلز میں منعقد ہونے والی سالانہ سیشلز ٹریل رن میں پاکستانی رنر وقار احمد نے ایک بار پھر شاندار کارکردگی دکھاتے ہوئے پاکستان کا نام روشن کر دیا۔ وقار احمد نے نہ صرف ایونٹ اپنے نام کیا بلکہ اپنے ٹائٹل کا کامیاب دفاع بھی کیا۔
22 کلومیٹر طویل دشوار گزار ٹریل رن میں وقار احمد نے غیر معمولی صلاحیتوں کا مظاہرہ کرتے ہوئے مقررہ فاصلہ 2 گھنٹے 11 منٹ 39 سیکنڈ میں مکمل کیا اور پہلی پوزیشن حاصل کی۔سیشلز ٹریل رن دنیا بھر کے ایتھلیٹس کے لیے ایک منفرد اور چیلنجنگ مقابلہ تصور کیا جاتا ہے، جہاں شرکاء کو پہاڑی راستوں، گھنے جنگلات، ساحلی علاقوں اور مشکل ٹریکس سے گزرنا پڑتا ہے۔مقابلے میں جنوبی افریقا کے رنر ڈینیئل کلاسن نے بھی عمدہ کارکردگی کا مظاہرہ کیا، تاہم وہ 2 گھنٹے 13 منٹ کے وقت کے ساتھ دوسری پوزیشن حاصل کر سکے۔
وقار احمد کی یہ کامیابی نہ صرف پاکستان کے لیے باعثِ فخر ہے بلکہ عالمی سطح پر پاکستانی رنرز کی بڑھتی ہوئی صلاحیتوں کا واضح ثبوت بھی سمجھی جا رہی ہے۔ ماہرین کے مطابق مسلسل دوسری بار ٹائٹل جیتنا وقار احمد کی محنت، مستقل مزاجی اور اعلیٰ فٹنس کا مظہر ہے۔