لاہور( ) خادم الحرمین سلمان بن عبدالعزیز ،ولی عہد محمد بن سلمان اورسعودی وزیر حج ڈاکٹر توفیق بن فوزان الربیعہ حجاج کرام کی خدمت کا حق ادا کررہے ہیں ۔ پاکستان میں سعودی سفیر نواف بن سعید المالکی اور وفاقی وزیر مذہبی امور سردار محمد یوسف کی خدمات بھی قابل تحسین ہیں۔ حج کے بہترین انتظامات عبادت بھی ہے اور سعادت بھی ہے ۔
ان خیالات کا اظہار پاکستان اسلامک کونسل کے چئیرمین اور جامعہ سعیدیہ سلفیہ کے پرنسپل ڈاکٹر حافظ مسعود اظہر نے کیا ۔ انھوں نے کہا کہ حج ایک عظیم عبادت ہے تاہم اس عبادت کا حق اسی وقت ادا ہوسکتا ہے جب مناسک حج سنت طریقے کے مطابق بجالائیں ۔ سعودی حکومت حج کے لیے ہر ممکن سہولیات فراہم کرتی ہے۔ روڈ ٹو مکہ پراجیکٹ بھی اسی سلسلہ کی کڑی ہے ۔سعودی حکومت کے ان اقدامات کی وجہ سے پاکستان ، ملائشیا ، بنگلہ دیش ،انڈونیشیا سے حج کے لیے جانے والوں کیلئے بہت آسانی ہوگئی ہے ، اسی طرح سعودی حکومت کے اقدامات کی وجہ سے منی، مزدلفہ اور عرفات کے عظیم ترقیاتی منصوبوں کی بدولت ضیوف الرحمان کو مناسک حج کی ادائیگی میں بہت آسانیاں اور سہولتیں رہی ہیں ۔ ضیوف الرحمان نے مکمل اطمینان و سکون کے ساتھ حج کے تمام مناسک ادا کرتے ہیں ، پاکستان میں سعودی سفیر سعادت الاستاذ نواف بن سعید المالکی بھی خادم الحرمین الشریفین کے ہدایات کے مطابق پاکستانی حجاج ومعتمرین کے لیے ہر طرح کی سہولیات ا ور آسانیاں پیدا کرنے کیلئے کوشاں رہتے ہیں اور حقیقی معنوں میں خادم الحرمین الشریفین کی نمائندگی کا حق ادا کیا ہے ، ہم پاکستانی عوام کی طرف سے خادم الحرمین الشریفین ملک سلمان بن عبدالعزیز آل سعود ، سعودی ولی عہد شہزادہ محمد بن سلمان ، سعودی حکام اور پاکستان میں سعودی عرب کے سفیر نواف بن سعید المالکی کے شکرگزار ہیں اور ان کی کوششوں کو تحسین کی نظر دیکھتے ہیں۔ سعودی سفیر نواف بن سعید المالکی جہاں پاکستان میں سعودی عرب کے سفیر ہیں اسی طرح وہ سعودی عرب میں بھی پاکستان کی سفارت کاری کا حق ادا کرتے ہیں جس پر پاکستانی قوم سعودی سفیر کی کوششوں کو تحسین کی نگاہ سے دیکھتی ہے ۔