امریکی صدر ڈونلڈ ٹرمپ نے کہا ہے کہ صدارت کے بعد وہ اسرائیل جا کر وزارتِ عظمیٰ کا انتخاب بھی لڑ سکتے ہیں۔
میڈیا بریفنگ کے دوران ڈونلڈ ٹرمپ نے دعویٰ کیا کہ اسرائیل میں ان کی مقبولیت انتہائی زیادہ ہے۔ انہوں نے کہا کہ “اس وقت اسرائیل میں میری مقبولیت 99 فیصد ہے، میں تو وہاں وزیرِ اعظم کے لیے بھی الیکشن لڑ سکتا ہوں۔”ٹرمپ نے مزید کہا کہ “شاید یہ سب کرنے کے بعد میں اسرائیل چلا جاؤں اور وہاں کا وزیرِاعظم بننے کی کوشش کروں، آج صبح میرے پاس ایک پول آیا جس میں میری مقبولیت 99 فیصد تھی۔”
یہ بیان ایسے وقت سامنے آیا ہے جب ٹرمپ اور اسرائیلی وزیرِ اعظم کے درمیان ایران سے متعلق بڑھتی کشیدگی پر اہم ٹیلیفونک رابطہ ہوا ہے۔ ذرائع کے مطابق دونوں رہنماؤں نے مشرقِ وسطیٰ کی صورتحال اور ایران کے معاملے پر تبادلۂ خیال کیا۔ڈونلڈ ٹرمپ نے گفتگو کے دوران نیتن یاہو کا دفاع بھی کیا اور کہا کہ اسرائیلی عوام اپنے وزیرِ اعظم کے ساتھ مناسب رویہ اختیار نہیں کر رہے۔
اگرچہ مختلف سرویز کے مطابق اسرائیل میں ٹرمپ کو دیگر کئی ممالک کے مقابلے میں نسبتاً زیادہ عوامی حمایت حاصل ہے، تاہم 99 فیصد مقبولیت کے دعوے کو مبالغہ آرائی قرار دیا جا رہا ہے، جسے مبصرین ٹرمپ کے مخصوص اندازِ گفتگو کا حصہ سمجھتے ہیں۔