کراچی میں موسم گرم، حبس میں اضافے کا امکان

محکمۂ موسمیات نے پیشگوئی کی ہے کہ شہر قائد کراچی میں آئندہ 24 گھنٹوں کے دوران موسم گرم اور مرطوب رہنے کا امکان ہے، جبکہ شہر میں وقفے وقفے سے تیز ہوائیں بھی چلتی رہیں گی۔

محکمۂ موسمیات کے مطابق شہر کا زیادہ سے زیادہ درجۂ حرارت 35 سے 37 ڈگری سینٹی گریڈ تک جانے کی توقع ہے، جس کے باعث گرمی کی شدت اور حبس میں اضافے کا امکان ظاہر کیا گیا ہے۔ادارے کی جانب سے جاری اعداد و شمار کے مطابق گزشتہ 24 گھنٹوں کے دوران شہر کا کم سے کم درجۂ حرارت 29.2 ڈگری سینٹی گریڈ ریکارڈ کیا گیا۔محکمۂ موسمیات نے مزید بتایا کہ شہر میں جنوب مغرب کی سمت سے 18 کلو میٹر فی گھنٹہ کی رفتار سے ہوائیں چل رہی ہیں، جبکہ ہوا میں نمی کا تناسب 75 فیصد ریکارڈ کیا گیا ہے، جس کے سبب شہریوں کو زیادہ حبس محسوس ہو سکتا ہے۔

ماہرین نے شہریوں کو ہدایت کی ہے کہ شدید گرمی اور مرطوب موسم کے پیشِ نظر غیر ضروری طور پر دھوپ میں نکلنے سے گریز کریں اور پانی کا زیادہ استعمال کریں۔