دبئی پولیس نے خود کو شہزادی ظاہر کرکے شاہی پروٹوکول کے ذریعے نایاب عود چوری کرنے والے گروہ کی چال ناکام بناتے ہوئے 4 ملزمان کو گرفتار کرلیا، جبکہ مرکزی خاتون ملزمہ سمیت مزید 4 افراد کی تلاش جاری ہے۔
پولیس کے مطابق 8 رکنی گروہ نے ایک عود کے تاجر کو یہ یقین دلایا کہ ایک اہم اور بااثر شخصیت قیمتی عود خریدنے میں دلچسپی رکھتی ہے۔ اس مقصد کے لیے تاجر کو ایک عالیشان محل میں مدعو کیا گیا جہاں شاہی طرز کے استقبال، خصوصی سکیورٹی انتظامات اور پروٹوکول کے ذریعے اس کا اعتماد حاصل کیا گیا،تحقیقات کے مطابق ملزمان نے منصوبہ بندی کے تحت تقریباً 12 ملین درہم (91 کروڑ روپے سے زائد) مالیت کا نایاب عود حاصل کیا اور انتہائی مہارت سے اصل عود کی جگہ عام لکڑیاں بیگوں میں رکھ کر تاجر کو واپس کردیں۔ تاجر کو اگلے روز اس وقت دھوکے کا علم ہوا جب اس نے خریداروں سے رابطہ کرنے کی کوشش کی مگر تمام فون نمبر بند ملے۔
متاثرہ تاجر کی شکایت پر دبئی پولیس نے فوری کارروائی کرتے ہوئے صرف 12 گھنٹوں کے اندر چوری شدہ عود برآمد کرلیا اور گروہ کے 4 ارکان کو گرفتار کر لیا۔ پولیس کا کہنا ہے کہ خود کو شہزادی ظاہر کرنے والی خاتون سمیت 4 مفرور ملزمان کی گرفتاری کے لیے ریڈ نوٹس جاری کر دیے گئے ہیں،دبئی پولیس نے اس کارروائی کو اپنی تیز رفتار تفتیشی صلاحیتوں اور جرائم کے خلاف مؤثر اقدامات کی ایک اہم مثال قرار دیا ہے۔ حکام کے مطابق گرفتار ملزمان کے خلاف قانونی کارروائی جاری ہے جبکہ مفرور افراد کی تلاش کے لیے بین الاقوامی سطح پر بھی اقدامات کیے جا رہے ہیں۔