گرمی کی شدت میں اضافے کے ساتھ ہی لاہور سمیت مختلف علاقوں میں بجلی کی غیر اعلانیہ بندش کا سلسلہ بھی بڑھ گیا، جس کے باعث شہریوں کو شدید مشکلات کا سامنا ہے۔
بجلی کے نظام پر بڑھتے ہوئے دباؤ کے باعث تکنیکی خرابیوں میں اضافہ دیکھنے میں آ رہا ہے۔ متعدد علاقوں میں ٹرانسفارمر جلنے اور دیگر فنی مسائل کے باعث بجلی کی آنکھ مچولی جاری ہے، جبکہ کئی مقامات پر صارفین گھنٹوں بجلی سے محروم رہتے ہیں،دیہی علاقوں میں صورتحال مزید سنگین بتائی جا رہی ہے جہاں تکنیکی خرابیوں کے باعث طویل دورانیے کی بندش معمول بن چکی ہے۔ شدید گرمی اور حبس کے موسم میں بجلی کی مسلسل بندش نے عوام کی مشکلات میں اضافہ کر دیا ہے۔
ذرائع کا کہنا ہے کہ لاہور الیکٹرک سپلائی کمپنی (لیسکو) کی بجلی کی طلب 3200 میگاواٹ سے تجاوز کر گئی ہے۔ تاہم طلب کے مطابق بجلی فراہم کی جا رہی ہے اور مجموعی طور پر بجلی کی کمی کا سامنا نہیں ہے.لیسکو حکام کے مطابق ہائی لاسز فیڈرز پر شیڈول کے مطابق 4 سے 5 گھنٹے کی لوڈشیڈنگ کی جا رہی ہے، جبکہ دیگر علاقوں میں سامنے آنے والی بندشیں زیادہ تر تکنیکی خرابیوں کا نتیجہ ہیں۔ حکام کا کہنا ہے کہ خراب ٹرانسفارمرز اور دیگر فنی مسائل کے فوری ازالے کے لیے ٹیمیں متحرک ہیں تاکہ بجلی کی فراہمی کو جلد از جلد بحال کیا جا سکے۔