اداکارہ دیشا پٹانی پر غموں کا پہاڑ ٹوٹ پڑا

ممبئی: بالی ووڈ کی معروف اداکارہ دیشا پٹانی، جانوروں سے بے پناہ محبت رکھنے والی اداکارہ نے ایک ہی دن اپنے دو انتہائی عزیز پالتو جانوروں، کتے بیلا اور بلی جیسمین کو کھو دیا، جس کے بعد ان کے گھر میں سوگ کی فضا چھا گئی۔

دیشا پٹانی سوشل میڈیا پر اکثر اپنے پالتو جانوروں کے ساتھ تصاویر اور ویڈیوز شیئر کرتی رہی ہیں اور متعدد انٹرویوز میں انہیں اپنی زندگی کا اہم حصہ قرار دے چکی ہیں۔ ان کے مطابق بیلا اور جیسمین نہ صرف ان کے بہترین ساتھی تھے بلکہ مصروف فلمی شیڈول کے بعد ان کی تھکن اور ذہنی دباؤ دور کرنے کا بھی ذریعہ بنتے تھے۔اداکارہ نے اس افسوسناک خبر سے اپنے مداحوں کو انسٹاگرام پر آگاہ کیا، جہاں انہوں نے دونوں پالتو جانوروں کی تصاویر شیئر کرتے ہوئے جذباتی پیغامات لکھے۔ بیلا کے نام اپنے پیغام میں دیشا نے کہا کہ اس نے ان کی زندگی کو خوبصورت اور رنگین بنایا، انہیں بے لوث محبت کا حقیقی مطلب سکھایا اور وہ ہمیشہ ان کی یادوں میں زندہ رہے گی۔

اپنی بلی جیسمین کے لیے بھی دیشا نے محبت بھرے الفاظ لکھتے ہوئے کہا کہ وہ ان کی سب سے پیاری "شہزادی” تھی اور اس کی ماں بننا ان کی زندگی کے خوبصورت ترین تجربات میں سے ایک تھا۔ انہوں نے لکھا کہ جیسمین ہمیشہ ان کے دل میں زندہ رہے گی۔دونوں پالتو جانوروں کی ایک ہی دن موت کی خبر نے مداحوں اور شوبز شخصیات کو بھی افسردہ کر دیا۔ سوشل میڈیا پر دیشا پٹانی کی پوسٹ پر ہزاروں مداحوں نے ہمدردی کا اظہار کرتے ہوئے اداکارہ کو صبر کی دعا دی۔

دیشا پٹانی جانوروں کی فلاح و بہبود کے حوالے سے بھی سرگرم رہتی ہیں اور کئی مواقع پر بے سہارا جانوروں کی دیکھ بھال اور ان کی حفاظت کے لیے آواز بلند کر چکی ہیں۔ قریبی ذرائع کے مطابق اپنے دونوں محبوب پالتو جانوروں کے اچانک انتقال کے بعد اداکارہ شدید غم میں ہیں اور انہیں اس صدمے سے نکلنے میں وقت لگ سکتا ہے۔