بی بی سی اردو کی رپورٹنگ کے انداز پر ایک بار پھر سوالات اٹھائے گئے ہیں، جہاں ناقدین نے دہشت گردی سے متعلق خبروں میں استعمال ہونے والی اصطلاحات اور زبان پر تحفظات کا اظہار کیا ہے۔
تنقید میں کہا گیا ہے کہ یہ سوال اہم ہے کہ بی بی سی اردو دہشت گرد گروہوں کا ذکر کرتے ہوئے واضح طور پر انہیں "دہشت گرد” قرار دینے کے بجائے "شدت پسند” اور "عسکریت پسند” جیسی اصطلاحات کیوں استعمال کرتا ہے۔
بیان میں مزید کہا گیا کہ رپورٹنگ کے دوران دہشت گردوں کے لیے بار بار احترام پر مبنی الفاظ جیسے "انہوں” اور "ان” کا استعمال بھی قابلِ غور ہے، جس سے ادارے کی اداراتی پالیسی اور خبر نویسی کے انداز پر سوالات جنم لیتے ہیں۔
ناقدین کے مطابق بی بی سی نے پاک فوج کے جوانوں کیلئے شہید کی بجائے ہلاک کا لفظ استعمال کیا جوکہ پاک فوج کے احترام کے خلاف بات ہے۔
ناقدین کے مطابق دہشت گردی جیسے حساس موضوع پر میڈیا کی بنیادی ذمہ داری یہ ہے کہ وہ حقائق کو واضح، درست اور یکساں انداز میں پیش کرے۔ ان کا مؤقف ہے کہ غیر جانبداری کا مطلب یہ نہیں ہونا چاہیے کہ ایسے معاملات میں وضاحت اور درست اصطلاحات کو نظر انداز کر دیا جائے۔
بیان میں اس بات پر بھی افسوس کا اظہار کیا گیا کہ ایسے ادارے سے وابستہ پاکستانی صحافیوں کی موجودگی کے باوجود بعض اداراتی فیصلے ایسے سوالات کو جنم دیتے ہیں جو رپورٹنگ کے معیار اور ادارتی پالیسی پر بحث کو مزید تقویت دیتے ہیں۔
یہ مؤقف سامنے آنے کے بعد سوشل میڈیا پر بھی اس معاملے پر مختلف آراء کا اظہار کیا جا رہا ہے، جہاں بعض صارفین واضح اصطلاحات کے استعمال کی حمایت کر رہے ہیں جبکہ دیگر صحافتی غیر جانبداری کے اصولوں پر زور دے رہے ہیں۔
بی بی سی اردو کی رپورٹنگ پر تنقید، دہشت گردوں کے لیے استعمال ہونے والی اصطلاحات پر سوالات
