ایران کے وزیر داخلہ اسکندر مومنی اعلیٰ سطحی سرکاری وفد کے ہمراہ سرکاری دورے پر اسلام آباد پہنچ گئے، جہاں وفاقی وزیر داخلہ محسن نقوی اور وزیر مملکت برائے داخلہ طلال چوہدری نے نور خان ایئربیس پر ان کا استقبال کیا۔
یہ دورہ ایسے وقت میں ہو رہا ہے جب مشرق وسطیٰ میں ایران اور امریکا کے درمیان کشیدگی ایک بار پھر بڑھ چکی ہے، جس کے باعث پورا خطہ غیر یقینی صورتحال سے دوچار ہے۔ اس تناظر میں ایرانی وزیر داخلہ کی پاکستان آمد کو سفارتی سطح پر اہم پیش رفت قرار دیا جا رہا ہے۔
دورے کے دوران اسکندر مومنی وزیراعظم شہباز شریف، فیلڈ مارشل سید عاصم منیر اور دیگر اعلیٰ پاکستانی حکام سے ملاقاتیں کریں گے۔ ان ملاقاتوں میں دونوں ممالک کے درمیان دوطرفہ تعلقات، سرحدی تعاون، داخلی سلامتی، انسداد دہشت گردی، سرحدی انتظام، غیر قانونی نقل و حرکت کی روک تھام اور خطے کی مجموعی سیکیورٹی صورتحال پر تفصیلی تبادلہ خیال متوقع ہے۔
ذرائع کے مطابق مذاکرات میں ایران اور امریکا کے درمیان حالیہ کشیدگی، اس کے خطے پر اثرات اور علاقائی امن و استحکام کے لیے مشترکہ اقدامات بھی زیر غور آئیں گے۔ پاکستان مسلسل سفارتی ذرائع سے مسائل کے حل اور خطے میں کشیدگی کم کرنے کی حمایت کرتا آیا ہے، جبکہ ایران بھی ہمسایہ ممالک کے ساتھ قریبی رابطوں کو اہمیت دے رہا ہے۔
دورے کے دوران ایرانی وزیر داخلہ پاکستانی قیادت کو ایرانی صدر کا خصوصی پیغام بھی پہنچائیں گے، جس میں دوطرفہ تعاون کو مزید فروغ دینے، باہمی اعتماد مضبوط بنانے اور علاقائی چیلنجز سے نمٹنے کے لیے مشترکہ حکمت عملی پر زور دیے جانے کا امکان ہے۔
توقع ہے کہ دونوں ممالک اس موقع پر سیکیورٹی تعاون، سرحدی رابطوں، تجارت اور دیگر مشترکہ مفادات کے شعبوں میں تعاون بڑھانے کے عزم کا اعادہ کریں گے۔ حکام کا کہنا ہے کہ پاکستان اور ایران کے درمیان مسلسل اعلیٰ سطحی رابطے نہ صرف دوطرفہ تعلقات کو مزید مستحکم کریں گے بلکہ خطے میں امن، استحکام اور باہمی تعاون کے فروغ میں بھی اہم کردار ادا کریں گے۔
ایرانی وزیر داخلہ اسکندر مومنی اعلیٰ سطحی وفد کے ہمراہ اسلام آباد پہنچ گئے
