اسلام آباد: پاکستان پیپلز پارٹی پارلیمنٹرینز کی مرکزی ترجمان شازیہ مری نے وزیراعلیٰ پنجاب مریم نواز کے حالیہ بیانات پر ردعمل دیتے ہوئے کہا ہے کہ مسلم لیگ (ن) کو دوسروں پر تنقید کرنے کے بجائے اپنی حکومتی کارکردگی کا جواب دینا چاہیے، کیونکہ الزامات سے حقائق تبدیل نہیں ہوتے۔
اپنے بیان میں شازیہ مری نے کہا کہ وزیراعلیٰ پنجاب مریم نواز پنجاب کے عوام کو مسائل کے گرداب میں چھوڑ کر آزاد کشمیر کی انتخابی مہم میں مصروف ہیں، جبکہ صوبے میں سیلاب سے متاثرہ ہزاروں خاندان آج بھی مشکلات کا شکار ہیں۔ انہوں نے کہا کہ صرف "سب اچھا ہے” کی گردان کرنے اور مہنگی تشہیری مہمات چلانے سے عوام کو ریلیف نہیں ملتا۔انہوں نے سوال اٹھایا کہ جنوبی پنجاب کی محرومیاں وزیراعلیٰ پنجاب کو کیوں دکھائی نہیں دیتیں، جبکہ وہاں کے عوام بنیادی سہولیات سے محروم ہیں۔ شازیہ مری کا کہنا تھا کہ حکومت کو اشتہارات کے بجائے عوامی مسائل کے عملی حل پر توجہ دینی چاہیے۔مرکزی ترجمان پیپلز پارٹی نے کہا کہ پیپلز پارٹی نے وفاقی حکومت کی غیر مشروط حمایت صرف پاکستان کے وسیع تر قومی مفاد میں کی ہے، تاہم اس حمایت کو کسی صورت کمزوری نہ سمجھا جائے۔ انہوں نے واضح کیا کہ پیپلز پارٹی قومی مفاد، جمہوریت اور عوامی حقوق پر کبھی سمجھوتہ نہیں کرے گی۔
شازیہ مری نے کہا کہ پیپلز پارٹی کی سیاست عوامی خدمت، جمہوری اقدار اور ذمہ دارانہ کردار پر مبنی ہے، جبکہ مسلم لیگ (ن) کو پیپلز پارٹی کی سیاست پر لیکچر دینے کے بجائے اپنی کارکردگی پر توجہ دینی چاہیے۔ ان کا کہنا تھا کہ عوام بخوبی جانتے ہیں کہ ہر مشکل وقت میں کس جماعت نے جمہوریت، ریاستی اداروں کے استحکام اور سیاسی نظام کے تسلسل کے لیے ذمہ دارانہ کردار ادا کیا۔انہوں نے کہا کہ انتخابی جلسوں میں اشتعال انگیز تقاریر اور مخالفین پر ذاتی حملے عوام کے مسائل کا حل نہیں ہیں۔ کشمیر کے عوام نعروں کے بجائے عملی خدمت، باوقار رویے اور حقیقی کارکردگی کو اہمیت دیتے ہیں۔شازیہ مری نے مزید کہا کہ آزاد کشمیر کے عوام اپنے ووٹ کی طاقت سے فیصلہ کریں گے، نہ کہ کسی جماعت کے دعووں یا خواہشات سے۔ انہوں نے کہا کہ پیپلز پارٹی کو اپنی عوامی طاقت پر مکمل اعتماد ہے اور انتخابی نتائج عوام کی آزاد رائے کے مطابق سامنے آئیں گے۔انہوں نے مسلم لیگ (ن) کو تنقید کا نشانہ بناتے ہوئے کہا کہ مخالفین کی نہیں بلکہ مسلم لیگ (ن) کی سیاست کانپ رہی ہے، جبکہ سیاسی اختلاف کو ذاتی حملوں میں تبدیل کرنا ن لیگ کی پرانی روایت بن چکی ہے۔ ان کا کہنا تھا کہ اب عوام محض دعووں پر نہیں بلکہ کارکردگی اور عملی اقدامات کی بنیاد پر اپنا فیصلہ کریں گے۔