ہنگومیں دہشتگردانہ حملے میں شہید پولیس اہلکاروں کی نماز جنازہ ادا کردی گئی، جس میں اعلیٰ پولیس و سول حکام، شہداء کے اہل خانہ اور شہریوں کی بڑی تعداد نے شرکت کی۔ شرکاء نے شہداء کی قربانیوں کو خراجِ عقیدت پیش کرتے ہوئے دہشت گردی کے خلاف جنگ جاری رکھنے کے عزم کا اظہار کیا۔
ہنگو کے علاقے خزینہ بانڈہ میں پولیس چیک پوسٹ پر دہشت گردوں کے حملے کے بعد سیکیورٹی فورسز اور پولیس نے مشترکہ آپریشن کیا، جس کے دوران 8 دہشت گرد ہلاک جبکہ 6 زخمی ہوگئے۔آر پی او کوہاٹ عرفان طارق کے مطابق آپریشن کے دوران ڈی ایس پی دیار خان بہادری سے دہشت گردوں کا مقابلہ کرتے ہوئے شہید ہوگئے۔ انہوں نے بتایا کہ مجموعی طور پر 9 پولیس اہلکاروں نے جامِ شہادت نوش کیا۔آر پی او کے مطابق آپریشن میں ڈی ایس پی مجاہد حسین سمیت 23 پولیس اہلکار زخمی ہوئے، جبکہ خزینہ چیک پوسٹ پر حملے میں مزید 5 اہلکار زخمی ہوئے۔ اس طرح زخمی پولیس اہلکاروں کی مجموعی تعداد 28 ہوگئی۔پولیس کے مطابق علاقے میں سرچ اور کلیئرنس آپریشن جاری ہے جبکہ دہشت گردوں کے سہولت کاروں کی تلاش بھی کی جا رہی ہے۔