قانون نافذ کرنے والے اداروں نے ساہیوال اور اوکاڑہ میں مبینہ دہشتگردی کا بڑا منصوبہ ناکام بناتے ہوئے 2 مشتبہ افراد کو گرفتار کر لیا ہے۔ گرفتار ملزمان بھارتی خفیہ ایجنسی "را” کے ایجنٹ ہیں
کاؤنٹر ٹیررازم ڈپارٹمنٹ (سی ٹی ڈی) پنجاب کے مطابق خفیہ اطلاع پر ساہیوال میں کارروائی کے دوران 2 مبینہ دہشتگردوں کو گرفتار کیا گیا۔ گرفتار افراد کی شناخت عبدالعزیز اور ولایت شاہ کے ناموں سے ہوئی ہے، جو پشاور کے رہائشی بتائے جاتے ہیں۔سی ٹی ڈی حکام کا کہنا ہے کہ ملزمان کے قبضے سے 4 کلو بارودی مواد، 3 دیسی ساختہ بم (آئی ای ڈیز)، 3 کلاشنکوفیں اور نقد رقم برآمد کی گئی ہے۔ حکام کے مطابق دہشتگردی کے لیے استعمال ہونے والا دیگر سامان بھی قبضے میں لے لیا گیا ہے۔حکام کے مطابق ابتدائی تفتیش میں انکشاف ہوا ہے کہ ملزمان ساہیوال اور اوکاڑہ میں دہشتگردی کی کارروائیاں کرنے کی منصوبہ بندی کر رہے تھے، تاہم بروقت کارروائی کرتے ہوئے ان کے مبینہ منصوبے کو ناکام بنا دیا گیا۔سی ٹی ڈی کا کہنا ہے کہ گرفتار ملزمان کے خلاف مقدمہ درج کر کے مزید تفتیش شروع کر دی گئی ہے، جبکہ ان کے ممکنہ سہولت کاروں اور نیٹ ورک کے دیگر افراد کا بھی سراغ لگایا جا رہا ہے۔