آزاد کشمیر کے عوام مریم نواز کی کارکردگی سے متاثر ، ترقی کے حق میں فیصلہ دیا،عظمیٰ بخاری

وزیر اطلاعات پنجاب عظمیٰ بخاری نے کہا ہے کہ آزاد کشمیر انتخابات میں خواتین کا ٹرن آؤٹ بہت اچھا رہا اور یہ الیکشن مریم نواز کی پنجاب میں کارکردگی پر ہوا۔

لاہور میں پریس کانفرنس کرتے ہوئے عظمیٰ بخاری نے کہا کہ آزاد کشمیر کے عوام وزیراعلیٰ پنجاب مریم نواز کی کارکردگی سے متاثر ہیں اور انتخابات میں عوام نے ترقی کے حق میں فیصلہ دیا،گزشتہ روز کچھ لوگ کہہ رہے تھے کہ وہ آزاد کشمیر میں پنجاب جیسی ترقی دیکھنا چاہتے ہیں، انتخابات میں خواتین کا ٹرن آؤٹ بہت اچھا رہا اور یہ الیکشن مریم نواز کی پنجاب میں کارکردگی پر ہوا۔

انہوں نے پیپلز پارٹی پر تنقید کرتے ہوئے کہا کہ جو لوگ سندھ میں گزشتہ 18 سال سے حکومت میں ہیں، ان کے پاس آزاد کشمیر کے عوام کو بتانے کے لیے کچھ بھی نہیں تھا اگر وہ عوام کو یہ نہیں بتا سکتے کہ 18 سال میں انہوں نے کیا کیا، تو یہ ان کے لیے لمحۂ فکریہ ہےمسلم لیگ (ن) خدمت اور ترقی پر یقین رکھتی ہے، جبکہ کشمیر کے عوام نے بھی ترقی کو ووٹ دیا ہے۔

ان کا کہنا تھا کہ مظفرآباد میں کسی شہری نے یہ نہیں کہا کہ اس نے پیپلز پارٹی کو ووٹ دیا ہے انہوں نے دعویٰ کیا کہ قمر زمان کائرہ کے حلقے میں پیپلز پارٹی کو 457 ووٹ ملے، جبکہ مسلم لیگ (ن) کے ہزاروں ووٹ تھے، پیپلز پارٹی میں کچھ ایسے مسترد شدہ سیاست دان موجود ہیں جو چاہتے ہیں کہ ملک میں ہر وقت فساد، لڑائی اور جھگڑے کی کیفیت برقرار رہے،پارٹی میں قابل لوگوں کی بات نہیں سنی جاتی اور ان کی آواز بلاول بھٹو تک بھی نہیں پہنچتی۔