پاکستان کی سفارتی کوششوں کے نتیجے میں مشرقِ وسطیٰ میں کشیدگی کم ہونے اور امن کی جانب اہم پیش رفت سامنے آئی ہے۔ عرب میڈیا اور بین الاقوامی ذرائع کے مطابق ایران آبنائے ہرمز میں بحری آمدورفت کی بحالی پر آمادہ ہو گیا ہے، جبکہ اس حوالے سے عبوری معاہدے کا اعلان آج متوقع ہے۔
رپورٹس کے مطابق تہران نے پاکستان کو اس معاملے پر مثبت اشارے دے دیے ہیں اور جاری سفارتی رابطوں کے دوران اہم پیش رفت حاصل ہوئی ہے۔ ذرائع کا کہنا ہے کہ مذاکرات میں شامل فریقین کے درمیان زیادہ تر نکات پر اتفاق ہو چکا ہے، تاہم ایک یا دو معاملات پر ابھی مزید مشاورت جاری ہے۔
عرب میڈیا کے مطابق پاکستان نے خطے میں کشیدگی کم کرنے اور سفارتی حل تلاش کرنے کے لیے سرگرم کردار ادا کیا، جس کے بعد ایران نے آبنائے ہرمز کی بحالی کے معاملے پر لچک کا مظاہرہ کیا۔ یہ پیش رفت عالمی تجارت اور توانائی کی منڈیوں کے لیے بھی انتہائی اہم قرار دی جا رہی ہے کیونکہ آبنائے ہرمز دنیا کے اہم ترین بحری راستوں میں شمار ہوتی ہے۔
ادھر امریکی ویب سائٹ ایگزیوس نے بھی اپنی رپورٹ میں دعویٰ کیا ہے کہ ایرانی قیادت نے مجوزہ عبوری معاہدے کی منظوری دے دی ہے۔ اگر باقی رہ جانے والے نکات پر بھی اتفاق ہو جاتا ہے تو معاہدے کا باضابطہ اعلان آئندہ چند گھنٹوں میں کیا جا سکتا ہے۔
تجزیہ کاروں کا کہنا ہے کہ اگر آبنائے ہرمز مکمل طور پر بحال ہو جاتی ہے تو عالمی منڈی میں خام تیل کی سپلائی مزید مستحکم ہوگی، جس سے تیل کی قیمتوں میں کمی کا رجحان برقرار رہ سکتا ہے۔ اس کے ساتھ ساتھ خطے میں بڑھتی ہوئی فوجی کشیدگی میں بھی کمی آنے کی توقع ہے۔
تاحال ایران یا دیگر متعلقہ ممالک کی جانب سے عبوری معاہدے کے اعلان کی سرکاری تصدیق سامنے نہیں آئی، تاہم سفارتی ذرائع اس پیش رفت کو انتہائی مثبت قرار دے رہے ہیں۔ ماہرین کے مطابق اگر یہ معاہدہ طے پا جاتا ہے تو یہ نہ صرف خطے کے امن بلکہ عالمی معیشت اور بین الاقوامی تجارت کے لیے بھی ایک اہم سنگ میل ثابت ہو سکتا ہے۔
پاکستان کی سفارتی کوششیں کامیاب، ایران آبنائے ہرمز کی بحالی پر آمادہ
