پاکستان کرکٹ بورڈ (PCB) نے نئے ڈومیسٹک سیزن (2026-27) کے لیے گریڈ ون ڈیپارٹمنٹل کرکٹ سے واپڈا اور ساہیر ایسوسی ایٹس کی ٹیموں کو باہر کر دیا ہے-
پاکستان کرکٹ بورڈ (پی سی بی) نے نئے ڈومیسٹک سیزن کے لیے اہم فیصلہ کرتے ہوئے موجودہ فرسٹ کلاس چیمپئن واپڈا اور ساحر ایسوسی ایٹس کو صدرز ٹرافی اور صدرز کپ سے باہر کر دیا ہے دونوں ادارے جون میں متعارف کرائے گئے نئے قواعد و ضوابط پر عمل درآمد کرنے میں ناکام رہے۔
پی سی بی کا کہنا ہے کہ ڈومیسٹک کرکٹ کو مزید پیشہ ورانہ اور معیاری بنانے کے لیے ٹیموں کے لیے مالی شفافیت، کھلاڑیوں کو سال بھر کے معاہدے، تنخواہوں اور میچ فیس کی نگرانی، رہائش، یومیہ الاؤنس اور فٹنس پروگرام سے متعلق نئی شرائط لازمی قرار دی گئی ہیں۔
ذرائع کے مطابق سب سے بڑا اختلاف شرکت کی فیس میں تین گنا اضافے پر سامنے آیا جسے بڑھا کر ڈیڑھ کروڑ روپے کردیا گیا۔
دیگر چھ اداروں نے پی سی بی کی جانب سے لائیو اسٹریمنگ، گراؤنڈ کرایہ اور میچ بالز کے اخراجات برداشت کرنے کی یقین دہانی کے بعد نئی شرائط قبول کرلیں تاہم واپڈا نے فیس میں نظرثانی کا مطالبہ کیا تھا،واپڈا اور ساحر ایسوسی ایٹس کی جگہ آئل اینڈ گیس ڈیولپمنٹ کمپنی لمیٹڈ (او جی ڈی سی ایل) اور کنگزمین اکیڈمی صدرز ٹرافی اور صدرز کپ میں شرکت کریں گی۔