میکسیکو کے معروف سوشل میڈیا انفلوئنسر سیزر گاسٹیلم کو ریاست سینالوا کے شہر کولیاکان میں لائیو اسٹریمنگ کے دوران گولی مار کر قتل کر دیا گیا۔
رپورٹس کے مطابق سیزر گاسٹیلم دو دوستوں کے ساتھ ایک فاسٹ فوڈ ریسٹورنٹ کے باہر ویڈیو بنا رہے تھے اور تینوں نے فوڈ ڈیلیوری رائیڈرز جیسی نارنجی جیکٹس اور بیگ پہن رکھے تھےاسی دوران موٹرسائیکل پر سوار دو افراد وہاں پہنچے جن میں سے ایک نے قریب آکر سیزر پر فائرنگ کی، جس سے وہ موقع پر ہی ہلاک ہو گئے۔
میکسیکو کے سیکیورٹی کابینہ نے سوشل میڈیا پلیٹ فارم ایکس پر جاری بیان میں کہا کہ گاسٹیلم کی بعض سوشل میڈیا پوسٹس کا جائزہ لیا جا رہا ہے، جن میں مبینہ طور پر ایک مجرمانہ گروہ کے دھڑے کا ذکر موجود تھا، سی سی ٹی وی فوٹیج اور دیگر شواہد کی مدد سے حملہ آوروں کی شناخت اور گرفتاری کی کوشش کی جا رہی ہے۔
ریاست سینالوا کا دارالحکومت کولیاکان منظم جرائم پیشہ گروہوں کے درمیان جاری خونریز تصادم کے باعث سیکیورٹی کی صورتحال پہلے ہی انتہائی خراب ہےیہ قتل گزشتہ برس میکسیکن بیوٹی انفلوئنسر ویلیریا مارکیز کے قتل کی یاد بھی تازہ کرتا ہے، جنہیں بھی ٹک ٹاک پر لائیو ویڈیو کے دوران ان کے سیلون میں گولی مار کر قتل کر دیا گیا تھا بعد ازاں حکام نے ایک مبینہ کارٹیل رہنما کو گرفتار کیا، جسے اس قتل سمیت متعدد سنگین جرائم میں ملوث قرار دیا گیا۔
سیزر گاسٹیلم کے قتل نے ایک بار پھر میکسیکو میں سوشل میڈیا شخصیات کی سیکیورٹی اور منظم جرائم کے بڑھتے ہوئے خطرات پر تشویش بڑھا دی ہے،سیزر گاسٹیلم کے ٹک ٹاک پر تقریباً 6 لاکھ فالوورز تھے اور وہ مزاحیہ ویڈیوز کی وجہ سے خاصی شہرت رکھتے تھے۔