پاکستان کرکٹ بورڈ (پی سی بی)نے ملتان میں 11 سے 19 اگست تک ہونے والے نیشنل چیمپئنز کپ کے لیے میچ آفیشلز کا اعلان کر دیا۔
سابق ٹیسٹ کرکٹرز علی نقوی اور کامران چوہدری پورے ٹورنامنٹ میں میچ کنٹرول ٹیموں کی نگرانی کریں گے دونوں آئی سی سی کے میچ ریفریز کے پینل میں بھی شامل ہیں،آئی سی سی کے انٹرنیشنل پینل کے امپائرز آصف یعقوب، فیصل خان آفریدی، ناصر حسین اور راشد ریاض وقار جبکہ پی سی بی نیشنل ایلیٹ پینل کے عبدالمقیط، سید امتیاز اقبال، طارق رشید اور ذوالفقار جان امپائرنگ کے فرائض انجام دیں گے۔
ٹورنامنٹ کے افتتاحی میچ میں آصف یعقوب اور ذوالفقار جان آن فیلڈ امپائرز ہوں گے، فیصل خان آفریدی تھرڈ امپائر جبکہ امتیاز اقبال چوتھے امپائر کی ذمہ داری سنبھالیں گےفائنل کے لیے علی نقوی میچ کنٹرول ٹیم کی سربراہی کریں گے جبکہ آصف یعقوب اور راشد ریاض وقار آن فیلڈ امپائرز، فیصل خان آفریدی تھرڈ امپائر اور ناصر حسین چوتھے امپائر ہوں گے۔
نیشنل چیمپئنز کپ میں پاکستان گرینز، پاکستان وائٹس، پاکستان بلیوز اور پاکستان گولڈ کی ٹیمیں شریک ہوں گی، 7 میچز پر مشتمل ٹورنامنٹ سنگل لیگ بنیاد پر کھیلا جائے گا اور سرفہرست دو ٹیمیں فائنل میں مدمقابل ہوں گی، تمام میچز ڈے نائٹ ہوں گے اور کھیل کا آغاز دوپہر 3 بجے ہوگا۔