فلپائن میں ایک مچھیرے کے ساتھ پیش آنے والا دلچسپ اور حیران کن واقعہ سوشل میڈیا پر توجہ کا مرکز بن گیا، جہاں ایک آکٹوپس اچانک مچھیرے کے چہرے سے چمٹ گیا اور کافی دیر تک اس کی گرفت برقرار رکھی۔
وائرل ویڈیو میں دیکھا جا سکتا ہے کہ آکٹوپس نے اپنے متعدد بازو مچھیرے کے چہرے اور سر کے گرد لپیٹ رکھے ہیں۔ مچھیرا خود کو آکٹوپس کی گرفت سے آزاد کرانے کی کوشش کرتا رہا، تاہم آکٹوپس کے طاقتور سکشن کپ اس کے چہرے سے مضبوطی سے چپکے ہوئے تھے۔
ویڈیو میں مچھیرے کو بار بار آکٹوپس کے بازو ہٹاتے ہوئے دیکھا جا سکتا ہے، لیکن اسے فوری طور پر کامیابی نہیں ملی۔ آکٹوپس کی گرفت اتنی مضبوط تھی کہ مچھیرے کو خاصی جدوجہد کرنا پڑی اور وہ احتیاط کے ساتھ ایک ایک بازو اپنے چہرے سے الگ کرتا رہا۔
کئی کوششوں کے بعد مچھیرے نے آہستہ آہستہ آکٹوپس کی گرفت ڈھیلی کرنے میں کامیابی حاصل کرلی۔ چہرے سے الگ ہونے کے بعد مچھیرے نے آکٹوپس کو دوبارہ پانی میں چھوڑ دیا۔
آکٹوپس اپنے آٹھ بازوؤں اور ان پر موجود بے شمار سکشن کپ کی وجہ سے مختلف سطحوں کو مضبوطی سے پکڑنے کی صلاحیت رکھتا ہے۔ یہی سکشن کپ اس واقعے میں مچھیرے کے لیے مشکلات کا باعث بنے اور اسے آکٹوپس کو اپنے چہرے سے ہٹانے کے لیے کافی محنت کرنا پڑی۔
واقعے کے حوالے سے ماہرین کا کہنا ہے کہ آکٹوپس کا یہ رویہ ممکنہ طور پر دفاعی ردعمل ہوسکتا ہے۔ غیر معمولی یا خطرناک صورتحال میں آکٹوپس اپنے ماحول اور خود کو محفوظ رکھنے کے لیے مضبوط گرفت اختیار کر سکتا ہے۔
یہ ویڈیو سوشل میڈیا صارفین کی توجہ کا مرکز بنی ہوئی ہے، جہاں بعض افراد نے مچھیرے کی جدوجہد کو دلچسپ قرار دیا، جبکہ کئی صارفین نے آکٹوپس کو محفوظ طریقے سے دوبارہ پانی میں چھوڑنے کے عمل کو بھی سراہا۔
مچھیرے کے چہرے سے آکٹوپس چمٹ گیا، ویڈیو وائرل
