ہنگری میں پولش زائرین کو لے جانے والی بس خوفناک حادثے کا شکار ہو گئی، جس کے نتیجے میں 12 افراد ہلاک جبکہ درجنوں زخمی ہو گئے۔ حادثہ اتوار کی صبح اس وقت پیش آیا جب بس ہنگری کے اہم ایم تھری موٹروے سے بے قابو ہو کر سڑک کنارے گڑھے میں جا گری اور الٹ گئی۔
پولیس کے مطابق حادثہ مقامی وقت کے مطابق رات تقریباً ایک بجے پیش آیا۔ ابتدائی تحقیقات سے معلوم ہوا ہے کہ ڈرائیور ممکنہ طور پر دوران سفر سو گیا تھا، جس کے باعث بس موٹروے سے اتر کر حادثے کا شکار ہوئی۔ پولیس نے ڈرائیور کو حراست میں لے لیا ہے۔
بس میں 57 مسافر اور دو ڈرائیور سوار تھے۔ فائر فائٹرز نے امدادی کارروائیوں کے دوران 35 افراد اور دونوں ڈرائیوروں کو ریسکیو کر لیا، جبکہ متعدد افراد بس کے نیچے پھنس گئے تھے۔
ہنگری کی ایمبولینس سروس کے مطابق ایک شخص کی حالت انتہائی تشویشناک ہے، جبکہ 9 افراد شدید زخمی اور 37 دیگر کو معمولی نوعیت کی چوٹیں آئیں۔ امدادی کارکنوں نے بھاری مشینری اور کرینوں کی مدد سے بس کو اٹھا کر پھنسے ہوئے افراد کو نکالنے کی کارروائی کی۔
یہ بس پولینڈ کے جنوبی علاقے پوڈکارپاتسی سے تعلق رکھنے والے زائرین کو لے کر بوسنیا اور ہرزیگووینا سے واپس آ رہی تھی۔
ہنگری کے وزیراعظم پیٹر ماگیار نے حادثے میں ہلاک ہونے والوں کے اہل خانہ سے تعزیت اور زخمیوں کی جلد صحت یابی کی دعا کی۔ دوسری جانب پولینڈ کے وزیراعظم ڈونلڈ ٹسک نے بھی متاثرہ خاندانوں سے اظہار ہمدردی کرتے ہوئے امدادی اقدامات کے لیے خصوصی پولش طیارہ اور طبی و سفارتی عملہ بھیجنے کا اعلان کیا۔
ہنگری میں پولش زائرین کی بس الٹ گئی، 12 افراد ہلاک
