کنگ چارلس کی بیماری چھپانا مشکل تھا، ملکہ کمیلا کا اعتراف

برطانیہ کی ملکہ کمیلا نے پہلی بار اپنے شوہر کنگ چارلس کی کینسر کی تشخیص کو عوام سے خفیہ رکھنے کے جذباتی تجربے کے بارے میں کھل کر بات کی ہے۔

کمیلا نے بتایا کہ انہیں کنگ کی بیماری کے بارے میں معلوم ہونے کے بعد یہ راز اپنے تک محدود رکھنا انتہائی مشکل محسوس ہوا۔ ان کے بقول وہ یہ بات سب کو بتانا چاہتی تھیں، لیکن اس وقت ایسا کرنا ممکن نہیں تھا۔کمیلا نے کہا، "میں یہ بات بتانے کے لیے بے تاب تھی، لیکن ظاہر ہے کہ میں ایسا نہیں کر سکتی تھی۔”
کمیلا نے یہ بات کینسر کیئر چیریٹی Maggie’s کے 30 سال مکمل ہونے کے موقع پر بکنگھم پیلس کے تعاون سے بنائی گئی ایک مختصر فلم میں کہی۔ وہ Maggie’s کی صدر بھی ہیں۔وہ 31 جنوری 2024 کو لندن کے رائل فری ہسپتال میں Maggie’s کے نئے کینسر سپورٹ سینٹر کے افتتاح کے موقع پر موجود تھیں۔ اس وقت انہیں کنگ چارلس کی بیماری کا علم تھا، تاہم محل کی جانب سے ان کی کینسر کی تشخیص کا باضابطہ اعلان پانچ دن بعد، فروری 2024 میں کیا گیا تھا۔کمیلا نے بتایا کہ وہ تقریب کے دوران تقریباً یہ راز ظاہر کرنے والی تھیں، لیکن انہیں محسوس ہوا کہ یہ بات بتانے کا مناسب وقت نہیں تھا۔انہوں نے کہا کہ کینسر سے متاثرہ افراد اور ان کے اہل خانہ کو دیکھ کر انہیں مزید احساس ہوا کہ ایسے سپورٹ سینٹرز کتنے اہم ہیں۔

ملکہ کمیلا نے کنگ چارلس کی بیماری کے دوران ان کی ہمت اور کام جاری رکھنے کے عزم کا بھی ذکر کیا۔انہوں نے بتایا کہ کنگ، جو اس سے قبل بڑھے ہوئے پروسٹیٹ کے علاج سے بھی صحت یاب ہو رہے تھے، نے بیماری کے باوجود اپنے کام کو جاری رکھا۔کمیلا کے مطابق کنگ چارلس کا کہنا تھا: "یہی میرا طریقہ ہے، میں اسی طرح اس کا مقابلہ کروں گا۔”

دسمبر میں کنگ چارلس نے بتایا تھا کہ ان کے کینسر کے علاج میں کمی کی جا رہی ہے۔ انہوں نے اس پیش رفت کو "اچھی خبر” قرار دیتے ہوئے کہا تھا کہ جلد تشخیص، مؤثر علاج اور ڈاکٹروں کی ہدایات پر عمل اس میں اہم عوامل رہے۔

Maggie’s کی چیف ایگزیکٹو ڈیم لورا لی کے مطابق کنگ چارلس کی جانب سے اپنی بیماری کے بارے میں کھل کر بات کرنے کے بعد ان کے مراکز میں آنے والے مردوں کی تعداد میں 12 فیصد اضافہ ہوا ہے۔انہوں نے کہا کہ کنگ کی جانب سے بیماری ظاہر کرنے سے دوسرے افراد کو بھی اپنی صحت کے بارے میں زیادہ کھل کر بات کرنے کی حوصلہ افزائی ملی ہے۔