راولپنڈی میں مسلسل موسلا دھار بارش کے باعث نالہ لئی میں شدید طغیانی آگئی، جس کے بعد نالے کے اطراف رہائش پذیر شہریوں کو خبردار کرنے کے لیے سائرن بجا دیے گئے۔
واسا راولپنڈی کا عملہ ہائی الرٹ ہے جبکہ شہر میں رین ایمرجنسی نافذ کردی گئی ہے۔ انتظامیہ نے تمام متعلقہ اداروں کو الرٹ رہنے اور کسی بھی ہنگامی صورتحال سے نمٹنے کے لیے تیار رہنے کی ہدایت کی ہے۔موسلا دھار بارش کے باعث راولپنڈی کے مختلف علاقوں میں پانی جمع ہوگیا۔ راجہ بازار اور ٹرنک بازار کی سڑکیں زیرِ آب آگئیں جبکہ سٹی صدر روڈ پر بھی بارش کا پانی جمع ہوگیا۔قاسم مارکیٹ سلپ سے ریس کورس روڈ تک بھی صورتحال متاثر ہوئی ہے، جبکہ متعدد دکانوں اور بیسمنٹس میں پانی داخل ہونے کی اطلاعات ہیں۔
انتظامیہ اور واسا کا عملہ مختلف علاقوں میں نکاسیٔ آب کے کام میں مصروف ہے۔ایم ڈی واسا نے شہریوں سے اپیل کی ہے کہ کسی بھی ہنگامی صورتحال میں فوری طور پر واسا ہیلپ لائن 1334 پر رابطہ کریں۔