سندھ حکومت نے صوبے بھر میں متروکہ وقف املاک کی حفاظت، دیکھ بھال اور ان کے جائز استعمال کو یقینی بنانے کے لیے اہم اقدام اٹھاتے ہوئے تمام اضلاع کے ڈپٹی کمشنرز کے اختیارات میں اضافہ کردیا ہے اور انہیں اپنے اپنے اضلاع میں متروکہ وقف املاک کا ایڈمنسٹریٹر مقرر کردیا ہے۔
اس حوالے سے محکمہ اقلیتی امور سندھ کی جانب سے باقاعدہ خصوصی نوٹیفکیشن بھی جاری کردیا گیا ہے۔ حکام کے مطابق اس اقدام کا مقصد اقلیتوں کے حقوق کا تحفظ اور ان سے وابستہ تاریخی و مذہبی اثاثوں کو ناجائز قبضوں، غلط استعمال اور ضائع ہونے سے محفوظ رکھنا ہے۔
نئے احکامات کے تحت تمام ڈپٹی کمشنرز اپنے متعلقہ اضلاع میں موجود متروکہ وقف املاک کے معاملات کی براہِ راست نگرانی کریں گے۔ انہیں ان املاک کے انتظام، دیکھ بھال اور دیگر متعلقہ امور کی ذمہ داری سونپی گئی ہے۔
جاری کردہ نوٹیفکیشن کے مطابق ڈپٹی کمشنرز اپنے اضلاع میں موجود تجارتی، زرعی اور مذہبی متروکہ وقف املاک کے انتظامی و مالی معاملات کی نگرانی کریں گے۔ اس کے ساتھ ساتھ املاک کی مناسب دیکھ بھال اور ان کے جائز استعمال کو یقینی بنانا بھی ان کی ذمہ داری ہوگی۔
سندھ حکومت کا کہنا ہے کہ ڈپٹی کمشنرز کو اضافی اختیارات دینے کا مقصد متروکہ وقف املاک کے انتظامی نظام کو بہتر بنانا، شفافیت کو یقینی بنانا اور قیمتی تاریخی و مذہبی اثاثوں کو کسی بھی قسم کے غیر قانونی قبضے یا غلط استعمال سے محفوظ رکھنا ہے۔