آزاد کشمیر میں حکومت سازی کے حوالے سے وزیراعظم ہاؤس میں اہم مشاورت مکمل کرلی گئی ہے، جبکہ بیرسٹر افتخار گیلانی کا نام وزیراعظم آزاد کشمیر کے عہدے کے لیے فائنل کرلیا گیا ہے۔
وزیراعظم شہباز شریف کی زیر صدارت ہونے والے اہم اجلاس میں آزاد کشمیر میں نئی حکومت کے قیام اور آئندہ کے سیاسی و پارلیمانی معاملات پر تفصیلی مشاورت کی گئی اور حکومت سازی کے حوالے سے اہم فیصلے کیے گئے۔
اجلاس میں سینیٹر رانا ثنا اللہ، خواجہ سعد رفیق، صدر مسلم لیگ (ن) آزاد کشمیر شاہ غلام قادر اور سابق وزیراعظم آزاد کشمیر راجا فاروق حیدر نے شرکت کی۔ نو منتخب اسپیکر آزاد کشمیر اسمبلی چوہدری طارق فاروق اور ڈپٹی اسپیکر احمد رضا قادری بھی اجلاس میں شریک ہوئے۔
اجلاس کے دوران آزاد کشمیر میں مسلم لیگ (ن) کی نئی حکومت کے قیام، آئندہ کی پارلیمانی حکمت عملی اور حکومت سازی کے مختلف امور کا جائزہ لیا گیا۔ اس موقع پر نئی کابینہ کی تشکیل اور حکومت کی آئندہ ترجیحات پر بھی تفصیلی مشاورت کی گئی۔
شرکا نے آزاد کشمیر میں گڈ گورننس کو یقینی بنانے، حکومتی امور کو مزید بہتر کرنے اور عوامی مسائل کے حل کے لیے مؤثر اقدامات پر بھی تبادلہ خیال کیا۔
اجلاس میں بیرسٹر افتخار گیلانی کو وزیراعظم آزاد کشمیر کے لیے امیدوار بنانے کا فیصلہ کیا گیا۔ آزاد کشمیر قانون ساز اسمبلی میں نئے وزیراعظم کا انتخاب 28 اگست کو ہوگا۔