ایران کے شہید رہبرِ اعلیٰ سید علی خامنہ ای اور ان کے ساتھ شہید ہوئے اہلِ خانہ کی نمازِ جنازہ عراق کے شہر نجف میں حضرت علی ؓ کے روضے پر ادا کر دی گئی،نمازِ جنازہ اور جلوسِ تدفین میں لاکھوں افراد نے شرکت کی، جبکہ عراقی پاپولر موبلائزیشن فورسز (حشد الشعبی) نے دعویٰ کیا ہے کہ شرکا کی تعداد 23 لاکھ سے تجاوز کر گئی ہے۔
حشد الشعبی کی جانب سے جاری بیان، جسے ایرانی سرکاری نشریاتی ادارے آئی آر آئی بی نے نشر کیا، میں کہا گیا کہ مختلف شہروں سے زائرین اور سوگواروں کی آمد کا سلسلہ جاری ہے، جس کے باعث شرکا کی تعداد میں مسلسل اضافہ ہو رہا ہے شہید رہبر کا تاریخی جلوسِ جنازہ کربلا کی جانب رواں دواں ہے، جس میں لاکھوں سوگوار شرکت کر رہے ہیں شہید خامنہ ای کے اہلِ خانہ کی میتیں کربلا میں روضہ امام حسین ؓ پر پہنچا دی گئیں۔
اس سے قبل ایرانی خبر رساں ادارے تسنیم نے بھی اطلاع دی تھی کہ آیت اللہ علی خامنہ ای کی میت عراق پہنچنے کے بعد نجف میں آخری رسومات کا آغاز کر دیا گیا، جہاں ہزاروں افراد نے جلوس میں شرکت کی آیت اللہ علی خامنہ ای کی میت ایران اور عراق میں کئی روز پر محیط آخری رسومات کے سلسلے میں نجف منتقل کی گئی اس دوران تہران، قم اور دیگر شہروں میں بھی تعزیتی اجتماعات منعقد کیے گئے، جبکہ بعد ازاں میت کو کربلا لے جایا جائے گا اور پھر ایران کے شہر مشہد منتقل کیا جائے گا، جہاں تدفین متوقع ہے۔
عینی شاہدین کے مطابق نجف کی سڑکیں سوگواروں سے بھر گئیں اور جلوس تقریباً 6 کلومیٹر طویل راستے سے گزر رہا ہے نجف کو مکہ مکرمہ اور مدینہ منورہ کے بعد شیعہ مسلمانوں کا تیسرا مقدس ترین شہر سمجھا جاتا ہے، جہاں ہر سال لاکھوں زائرین مذہبی تقریبات میں شرکت کرتے ہیں۔
گزشتہ روز قم میں جلوسِ جنازہ کے بعد شہید سید علی خامنہ ای اور ان کے اہلِ خانہ کی میتیں رات کو عراق منتقل کی گئی تھیں شہداء کی تدفین کل ان کے آبائی شہر مشہد میں روضہ امام رضا ؓ کے احاطے میں کی جائے گی۔