بہاولنگر باغی ٹی وی محمد عرفان نامہ نگار ،ڈپٹی کمشنر بہاولنگر ذوالفقار احمد بھون اور ڈی پی او محمد عمران نے ایڈیشنل ڈپٹی کمشنر جنرل، اسسٹنٹ کمشنر بہاول نگر ،سکیورٹی اداروں کے افسران، متعلقہ محکموں کے نمائندگان اور امن کمیٹی کے اراکین کے ہمراہ محرم الحرام کے سلسلہ میں شہر کی مختلف امام بارگاہوں اور جلوسوں کے روٹس کا تفصیلی دورہ کیا۔
اس موقع پر انہوں نے سکیورٹی، صفائی ستھرائی، لائٹنگ، ٹریفک مینجمنٹ، ریسکیو اور دیگر انتظامات کا جائزہ لیا اور متعلقہ افسران کو ہدایات جاری کرتے ہوئے کہا کہ محرم الحرام کے دوران امن و امان کے قیام اور عزاداروں کو ہر ممکن سہولت کی فراہمی یقینی بنائی جائے۔ انہوں نے کہا کہ جلوسوں اور مجالس کے روٹس پر تمام ضروری انتظامات بروقت مکمل کیے جائیں اور کسی قسم کی غفلت یا کوتاہی برداشت نہیں کی جائے گی۔
ڈپٹی کمشنر اور ڈی پی او نے ہدایت کی کہ تمام متعلقہ ادارے باہمی رابطے کے ساتھ اپنی ذمہ داریاں ادا کریں تاکہ محرم الحرام کے دوران امن، بھائی چارے اور مذہبی ہم آہنگی کی فضا برقرار رہے۔