بانی پاکستان تحریکِ انصاف (پی ٹی آئی) کے قریبی ساتھیوں کے خلاف فارن فنڈنگ سے متعلق مقدمے میں اہم پیش رفت سامنے آئی ہے۔ بینکنگ کورٹ نمبر دو نے مقدمے کا تفصیلی فیصلہ سناتے ہوئے طارق شفیع، حامد زمان اور اسد کاکا خیل کو بری کر دیا۔
عدالتی فیصلے کے مطابق استغاثہ ملزمان کے خلاف الزامات ثابت کرنے میں ناکام رہا، جس کے باعث عدالت نے تینوں ملزمان کو شک کا فائدہ دیتے ہوئے بری کرنے کا حکم جاری کیا۔ مقدمے کی سماعت کے دوران ملزمان کی جانب سے بیرسٹر میاں علی اشفاق اور عدنان طارق نے عدالت میں مفصل دلائل پیش کیے۔
یاد رہے کہ وفاقی تحقیقاتی ادارے (ایف آئی اے) نے سال 2022 میں ملزمان کے خلاف مقدمہ درج کیا تھا۔ ایف آئی اے کے مطابق ملزمان پر الزام تھا کہ انہوں نے انصاف ٹرسٹ کے لیے غیر ملکی فنڈنگ حاصل کی، جو ملکی قوانین کی خلاف ورزی کے زمرے میں آتی ہے۔ اس سلسلے میں ایف آئی اے نے عدالت میں چالان بھی جمع کرایا تھا اور دعویٰ کیا تھا کہ تحقیقات کے دوران شواہد اکٹھے کیے گئے ہیں۔سماعت کے دوران دفاعی وکلا نے مؤقف اختیار کیا کہ ملزمان کے خلاف عائد الزامات بے بنیاد ہیں اور استغاثہ کی جانب سے پیش کیے گئے شواہد قانونی تقاضوں پر پورا نہیں اترتے۔ وکلا نے یہ بھی مؤقف اپنایا کہ ملزمان کے کسی اقدام سے غیر قانونی فارن فنڈنگ ثابت نہیں ہوتی۔عدالت نے فریقین کے دلائل سننے اور ریکارڈ کا بغور جائزہ لینے کے بعد فیصلہ سنایا کہ استغاثہ الزامات ثابت کرنے میں ناکام رہا ہے، جس کے بعد بینکنگ کورٹ نمبر دو نے تینوں ملزمان کو بری کرنے کا حکم دے دیا۔