بھارتی ریاست راجستھان کے ٹیکسٹائل سٹی بھیلواڑہ سے ایک انتہائی سنسنی خیز اور چونکا دینے والا واقعہ سامنے آیا ہے، جس نے معاشرتی اور اخلاقی اقدار پر کئی سوالات کھڑے کر دیے ہیں۔
گاندھی نگر تھانہ کی حدود میں پیش آنے والے اس واقعے نے پورے علاقے میں ہلچل مچا دی ہے،پولیس کے مطابق ایک شادی شدہ خاتون نے اپنے شوہر سے نجات حاصل کرنے کے لیے نہایت خطرناک اور منظم سازش تیار کی۔ خاتون نے مبینہ طور پر اپنے سابق عاشق کے ساتھ مل کر اپنی ایک نازیبا ویڈیو بنائی، جسے بعد ازاں جعلی سوشل میڈیا اکاؤنٹ کے ذریعے وائرل کیا گیا۔ اس ویڈیو کے ذریعے شوہر کو بدنام کرنے اور اسے قانونی مسائل میں الجھانے کی کوشش کی گئی۔متاثرہ شوہر نے گاندھی نگر پولیس اسٹیشن میں درخواست دیتے ہوئے مؤقف اختیار کیا کہ 20 مارچ کی رات اچانک اس کی بیوی کی ایک “باتھ روم ویڈیو” سوشل میڈیا پر وائرل ہوگئی، جس میں خاتون کو نہاتے ہوئے دکھایا گیا۔ اس کے ساتھ ہی یہ تاثر دیا گیا کہ ویڈیو خود شوہر نے ریکارڈ کر کے پھیلائی ہے۔
متاثرہ شخص کے مطابق، اس کے بعد خاتون اور اس کے مبینہ عاشق نے اسے بلیک میل کرتے ہوئے 10 لاکھ روپے کا مطالبہ کیا۔ دھمکی دی گئی کہ اگر رقم ادا نہ کی گئی تو اس کے خلاف جھوٹے مقدمات درج کرائے جائیں گے، جس سے اس کی ساکھ اور زندگی تباہ ہو سکتی ہے۔پولیس نے فوری کارروائی کرتے ہوئے سائبر کرائم ٹیم کو شامل کیا، جس نے ڈیجیٹل فرانزک تحقیقات کے دوران اہم شواہد حاصل کیے۔ ابتدائی تفتیش میں سامنے آیا کہ خاتون نے اپنے عاشق اور اس کے ساتھیوں کے ساتھ مل کر جعلی آئی ڈی بنائی، جس کے ذریعے ویڈیو اپ لوڈ کی گئی۔
ضلع پولیس سربراہ دھرمیندر سنگھ یادو کی ہدایت پر سائبر سیل نے مزید تحقیقات کیں، جن میں چیٹس، پیغامات اور دیگر ڈیجیٹل ریکارڈز نے اس سازش کی تصدیق کی۔ یہ بھی انکشاف ہوا کہ عاشق نے خاتون کو سم کارڈ فراہم کیا تھا تاکہ جعلی اکاؤنٹ بنایا جا سکے۔مزید برآں، یہ بات بھی سامنے آئی کہ اس سے قبل سسرالی افراد کی جانب سے شوہر کے خلاف زیورات ہڑپ کرنے کا مقدمہ بھی درج کرایا گیا تھا، جسے اب اسی بڑی سازش کا حصہ قرار دیا جا رہا ہے۔پولیس نے خاتون، اس کے مبینہ عاشق اور دو دیگر افراد کے خلاف مقدمہ درج کر لیا ہے جبکہ مزید تفتیش جاری ہے۔ حکام کے مطابق یہ منصوبہ انتہائی چالاکی سے تیار کیا گیا تھا، جس کی وجہ سے ابتدائی طور پر کئی لوگ شوہر کو ہی قصوروار سمجھ بیٹھے، تاہم تکنیکی تحقیقات نے حقیقت آشکار کر دی۔پولیس کا کہنا ہے کہ جعلی سوشل میڈیا اکاؤنٹ اور ویڈیو کے اصل ماخذ تک پہنچنے کے لیے سائبر ٹیم مسلسل کام کر رہی ہے اور جلد مزید اہم انکشافات متوقع ہیں۔