لٹن روڈ،ریسٹورنٹ پر ڈکیتی میں ملوث ڈاکو مبینہ پولیس مقابلے میں ہلاک

لاہور میں لٹن روڈ کے ایک معروف ریسٹورنٹ پر ڈکیتی کی واردات میں ملوث تینوں مبینہ ڈاکو پولیس مقابلے میں ہلاک ہوگئے۔

پولیس حکام کے مطابق ملزمان کو ریکوری کے لیے لے جایا جا رہا تھا کہ اس دوران ان کے ساتھیوں نے انہیں چھڑانے کی کوشش کرتے ہوئے فائرنگ کر دی، جس کے نتیجے میں تینوں زیر حراست ملزمان مارے گئے۔ترجمان لاہور پولیس کے مطابق واقعہ کرول گھاٹی کے قریب پیش آیا، جہاں پولیس ٹیم ملزمان کو واردات میں استعمال ہونے والا اسلحہ اور دیگر سامان برآمد کروانے کے لیے لے جا رہی تھی۔ پولیس کا کہنا ہے کہ اچانک نامعلوم مسلح افراد نے پولیس پارٹی پر اندھا دھند فائرنگ شروع کر دی۔ جوابی کارروائی کے دوران فائرنگ کے تبادلے میں تینوں ملزمان اپنے ہی ساتھیوں کی گولیوں کی زد میں آ کر ہلاک ہوگئے، جبکہ حملہ آور فرار ہونے میں کامیاب ہو گئے۔

پولیس حکام کے مطابق ہلاک ہونے والے ملزمان کو چند روز قبل ساہیوال اور نارووال سے گرفتار کیا گیا تھا۔ ابتدائی تفتیش میں انکشاف ہوا تھا کہ ملزمان جیل سے رہائی کے بعد دوبارہ متحرک ہوئے اور انہوں نے اپنا نیا گینگ تشکیل دے کر شہر کے مختلف علاقوں میں وارداتوں کا سلسلہ شروع کر رکھا تھا۔ لٹن روڈ کے ریسٹورنٹ پر ہونے والی ڈکیتی بھی اسی گینگ کی کارروائی بتائی جا رہی ہے۔پولیس کے مطابق ملزمان کے قبضے سے 12 لاکھ روپے نقدی بھی برآمد کی گئی ہے، جو مبینہ طور پر حالیہ وارداتوں سے حاصل کی گئی تھی۔ قانون نافذ کرنے والے اداروں کا کہنا ہے کہ فرار ہونے والے ساتھیوں کی گرفتاری کے لیے علاقے میں سرچ آپریشن شروع کر دیا گیا ہے اور مختلف مقامات پر چھاپے مارے جا رہے ہیں۔