ڈیرہ غازی خان میں حالیہ ژالہ باری کے بعد ضلعی انتظامیہ متحرک ہو گئی ہے۔ ڈپٹی کمشنر محمد عثمان خالد نے کوہِ سلیمان اور خصوصاً فورٹ منرو کے متاثرہ علاقوں میں نقصانات کے فوری سروے کے احکامات جاری کر دیے ہیں۔ایڈیشنل ڈپٹی کمشنر ریونیو سید عثمان منیر بخاری کی جانب سے جاری نوٹیفکیشن کے مطابق ژالہ باری سے لائیو اسٹاک اور نجی املاک کو ہونے والے نقصانات کے تخمینہ کیلئے ایک مشترکہ سروے ٹیم تشکیل دے دی گئی ہے۔ٹیم میں اسسٹنٹ کمشنر کو کنوینر مقرر کیا گیا ہے جبکہ تحصیلدار کوہِ سلیمان، متعلقہ ایس ڈی او بلڈنگ، ویٹرنری آفیسر اور پی ڈی ایم اے/ڈیزاسٹر مینجمنٹ کا نمائندہ بطور ممبران شامل ہوں گے۔
سروے ٹیم کو ہدایت کی گئی ہے کہ:
متاثرہ علاقوں کا جامع فیلڈ سروے کیا جائے
لائیو سٹاک اور نجی املاک کے نقصانات کا درست تخمینہ لگایا جائے
متعلقہ ریکارڈ کے ذریعے نقصانات کی تصدیق کی جائے
امداد و معاوضہ کے لیے مستند ڈیٹا تیار کیا جائے
ٹیم کو ہدایت دی گئی ہے کہ سات روز کے اندر تفصیلی رپورٹ ڈپٹی کمشنر کو پیش کی جائے۔ مزید برآں پولیٹیکل اسسٹنٹ کوہِ سلیمان کو مختلف محکموں کے درمیان مؤثر کوآرڈینیشن اور بروقت تکمیل یقینی بنانے کا ٹاسک دیا گیا ہے۔ضلعی انتظامیہ کے مطابق عوامی آگاہی کو بھی یقینی بنایا جائے گا تاکہ متاثرہ افراد بروقت معلومات فراہم کر سکیں۔ انتظامیہ نے اس عزم کا اظہار کیا ہے کہ سروے رپورٹ کی روشنی میں متاثرین کو ہر ممکن ریلیف فراہم کیا جائے گا۔
ڈیرہ غازی خان: کوہِ سلیمان اور فورٹ منرو میں ژالہ باری، نقصانات کے سروے کا حکم، مشترکہ ٹیم تشکیل
