پاکستان مرکزی مسلم لیگ کے زیرِاہتمام فیصل آباد میں “معرکہِ حق کارواں” کا شاندار انعقاد کیا گیا، جس میں شہریوں، نوجوانوں اور بچوں نے بڑی تعداد میں شرکت کر کے وطنِ عزیز اور افواجِ پاکستان سے اپنی محبت کا بھرپور اظہار کیا۔
شرکاء ہاتھوں میں قومی پرچم اور “ہم بنیانِ مرصوص ہیں” کے کتبے اٹھائے ہوئے تھے، جبکہ فضا “پاکستان زندہ باد”، “پاک فوج زندہ باد” اور “آرمی چیف زندہ باد” کے فلک شگاف نعروں سے گونجتی رہی۔کارواں کی قیادت پروفیسر سیف اللہ قصوری، پروفیسر حافظ محمد طلحہ سعید، شفیق الرحمن وڑائچ، مولانا امیر حمزہ اور محمد احسن تارڑ سمیت دیگر قائدین نے کی۔اس موقع پر قائدین نے خطاب کرتے ہوئے کہا کہ “معرکہِ حق” کی کامیابی پوری قوم کے اتحاد، جذبۂ حب الوطنی اور استقامت کی علامت ہے۔ انہوں نے وطن کے دفاع کے لیے پاک فوج کی لازوال قربانیوں کو خراجِ تحسین پیش کرتے ہوئے اس عزم کا اعادہ کیا کہ قوم ہمیشہ اپنی افواجِ پاکستان کے شانہ بشانہ کھڑی رہے گی۔