بنوں: خلیفہ گل نواز ہسپتال کے یورالوجی وارڈ میں شارٹ سرکٹ کے باعث آگ بھڑک اٹھی-
ریسکیو 1122 کے مطابق ہنگامی اطلاع ملنے کے تقریباً 5 منٹ بعد ریسکیو اہلکار موقع پر پہنچ گئے، جنہوں نے اسپتال عملے کے ساتھ مل کر آگ بجھانے اور مر یضوں کے انخلا کا عمل شروع کیا، آگ پر تقریباً 10 منٹ میں قابو پالیا گیا جبکہ وارڈ میں موجود تمام مریضوں کو بحفاظت محفوظ مقام پر منتقل کر دیا گیا۔
اسپتال کے ترجمان محمد نعمان کے مطابق آگ صبح تقریباً 10 بجے لگی اور ابتدائی معلومات کے مطابق اس کی وجہ بجلی کا شارٹ سرکٹ یا برقی چنگاری معلوم ہوتی ہے اسپتال عملے اور ریسکیو ٹیموں نے فوری طور پر وارڈ میں موجود مریضوں کو محفوظ مقام پر منتقل کیا اور آگ بجھانے کی کارروائیاں شروع کردیں بروقت اقدامات کے باعث آگ کو دوسرے حصوں تک پھیلنے سے روک لیا گیا۔
ابتدائی اطلاعات کے مطابق آگ لگنے کی ممکنہ وجہ بجلی کا اسپارک بتائی جا رہی ہے، تاہم حتمی وجہ کا تعین مزید جائزے کے بعد ہی ہو سکے گا۔ بروقت کارروائی کے باعث آگ کو ہسپتال کے دیگر حصوں تک پھیلنے سے روک لیا گیا-
بنوں کا یہ واقعہ اسلام آباد کے پمز اسپتال میں آتشزدگی کے دو ہفتے سے بھی کم عرصے بعد پیش آیا ہے، جہاں آگ لگنے سے 14 نومولود جاں بحق ہوگئے تھےواقعے کے بعد ملک بھر میں اسپتالوں میں فائر سیفٹی کے انتظامات بہتر بنانے اور ہنگامی صورتحال سے نمٹنے کے لیے اقدامات تیز کیے گئے۔
اسی سلسلے میں لاہور کے جنرل اسپتال کی گائنی وارڈ میں اور ہفتے کے روز پنجاب کے ضلع رحیم یار خان میں شیخ زاید میڈیکل کالج اسپتال کے آپریشن تھیٹر میں بھی دورانِ جراحی آگ لگنے کا واقعہ پیش آیا تھا،ابتدائی اطلاعات کے مطابق آگ بجلی کی ناقص وائرنگ کے باعث لگی، جس کے بعد ڈاکٹروں اور پیرا میڈیکل اسٹاف نے فوری طور پر آپریشن روک کر مریضوں کو محفوظ مقام پر منتقل کردیا۔