بنوں: خیبر پختونخوا کے ضلع بنوں میں سی پیک سرکلر روڈ پر نامعلوم مسلح افراد کی نجی ایمبولینس پر اندھا دھند فائرنگ کے نتیجے میں 4 افراد جاں بحق ہوگئے۔
پولیس کے مطابق واقعہ غوری والا کے علاقے میں پیش آیا، جہاں نامعلوم حملہ آوروں نے سی پیک روڈ سے گزرنے والی نجی ایمبولینس کو نشانہ بنایا۔ فائرنگ کے نتیجے میں ایمبولینس میں موجود چار افراد موقع پر ہی جاں بحق ہوگئے۔ جاں بحق افراد کی لاشوں کو پوسٹ مارٹم کے لیے ڈسٹرکٹ ہیڈ کوارٹر (ڈی ایچ کیو) اسپتال بنوں منتقل کر دیا گیا ہے، جبکہ مقتولین کی شناخت کا عمل جاری ہے۔پولیس حکام کا کہنا ہے کہ ابتدائی شواہد کے مطابق واقعہ دہشت گردی معلوم ہوتا ہے، تاہم تفتیش مختلف پہلوؤں سے جاری ہے تاکہ حملے کی نوعیت اور اس کے پس پردہ عناصر کا تعین کیا جا سکے۔
حکام کے مطابق ایمبولینس کو نشانہ بنانا انتہائی سنگین اور قابل مذمت فعل ہے، کیونکہ ایمبولینس ایک انسانی خدمت انجام دینے والی گاڑی ہوتی ہے جو مریضوں، زخمیوں اور میتوں کی منتقلی کے لیے استعمال کی جاتی ہے۔ ایسے حملے نہ صرف انسانی جانوں بلکہ بنیادی انسانی اور اخلاقی اقدار پر بھی حملہ تصور کیے جاتے ہیں۔واقعے کے فوراً بعد سیکیورٹی فورسز اور قانون نافذ کرنے والے اداروں نے علاقے کو گھیرے میں لے کر سرچ اینڈ کلیئرنس آپریشن شروع کر دیا ہے۔ حکام کا کہنا ہے کہ حملے میں ملوث عناصر کی گرفتاری اور انہیں قانون کے کٹہرے میں لانے کے لیے تمام دستیاب وسائل بروئے کار لائے جا رہے ہیں۔ حکام نے اس عزم کا اعادہ کیا کہ خیبر پختونخوا میں امن و امان کو نقصان پہنچانے کی ہر کوشش کو ناکام بنایا جائے گا اور عوام کے جان و مال کے تحفظ کے لیے ریاستی ادارے اپنی کارروائیاں جاری رکھیں گے۔