عمان کے جنوب مشرقی ساحلی علاقے میں ایک کارگو جہاز پر نامعلوم پروجیکٹائل حملے کے بعد عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے، جبکہ آبنائے ہرمز سے تیل کی ترسیل کے حوالے سے خدشات بھی ایک بار پھر شدت اختیار کر گئے ہیں۔
برطانوی میری ٹائم ایجنسی کے مطابق عمان کے ساحل سے تقریباً ساڑھے سات ناٹیکل میل کے فاصلے پر موجود ایک کارگو جہاز کو نامعلوم پروجیکٹائل سے نشانہ بنایا گیا، جس کے نتیجے میں جہاز کے اگلے حصے کو نقصان پہنچا۔ حکام کا کہنا ہے کہ واقعے کی تحقیقات جاری ہیں،واقعے کے فوری بعد عالمی تیل مارکیٹ میں بے چینی دیکھی گئی اور خام تیل کی قیمتوں میں دو فیصد سے زائد اضافہ ریکارڈ کیا گیا۔ برینٹ خام تیل کی قیمت 1.52 ڈالر یا 2.1 فیصد اضافے کے بعد 75.26 ڈالر فی بیرل پر بند ہوئی، جبکہ ویسٹ ٹیکساس انٹرمیڈیٹ (WTI) خام تیل 1.58 ڈالر یا 2.3 فیصد اضافے کے ساتھ 71.92 ڈالر فی بیرل تک پہنچ گیا۔
خبر رساں اداروں کے مطابق اس سے ایک روز قبل خام تیل کی قیمتیں 27 فروری کے بعد اپنی کم ترین سطح پر بند ہوئی تھیں، تاہم عمان کے قریب پیش آنے والے اس حملے نے مارکیٹ کا رجحان یکسر تبدیل کر دیا۔رپورٹس کے مطابق حملے کے بعد اہم عالمی آبی گزرگاہ آبنائے ہرمز سے جہازوں کے انخلا اور نقل و حرکت سے متعلق بعض اقدامات عارضی طور پر روک دیے گئے، جس کے باعث عالمی سطح پر تیل کی سپلائی متاثر ہونے کے خدشات دوبارہ بڑھ گئے ہیں۔