پی آئی اے نجکاری کا پہلا مرحلہ مکمل،کامیاب کنسورشیم کو دو تہائی سے زائد شیئرز منتقل

پاکستان انٹرنیشنل ایئرلائن (پی آئی اے) کی نجکاری کے عمل میں اہم پیش رفت سامنے آئی ہے، جہاں نجکاری کا پہلا مرحلہ کامیابی سے مکمل کر لیا گیا ہے۔ کامیاب بولی دہندہ کنسورشیم نے قومی ایئرلائن کے 66.67 فیصد شیئرز حاصل کر لیے ہیں، جس کے بعد ملکیت کا نیا ڈھانچہ باضابطہ طور پر نافذ ہو گیا۔
‎تفصیلات کے مطابق پی آئی اے ہولڈنگ کمپنی نے پاکستان اسٹاک ایکسچینج (پی ایس ایکس) کو باضابطہ خط ارسال کرتے ہوئے اس پیش رفت سے آگاہ کیا۔ خط میں بتایا گیا کہ 29 جون 2026 کو نجکاری معاہدے کے پہلے مرحلے کی تکمیل ہوئی، جس کے تحت شیئر پرچیز اینڈ سبسکرپشن معاہدے کے مطابق شیئرز کی منتقلی کا عمل مکمل کر لیا گیا۔
‎اس مرحلے کے بعد پی آئی اے ایکویٹی لمیٹڈ قومی ایئرلائن کا اکثریتی شیئر ہولڈر بن گیا ہے، جبکہ پی آئی اے ہولڈنگ کمپنی کے پاس اب بھی 33.33 فیصد شیئرز برقرار رہیں گے۔
‎خط میں یہ بھی بتایا گیا کہ نجکاری معاہدے کے تحت نئے شیئرز کے اجرا کے ذریعے پہلی ایکویٹی سرمایہ کاری بھی مکمل کر لی گئی ہے۔ معاہدے کے مطابق پہلی قسط بطور تازہ سرمایہ پی آئی اے کو منتقل کر دی گئی ہے، جس سے ایئرلائن کی مالی پوزیشن مستحکم بنانے اور آپریشنل بہتری میں مدد ملنے کی توقع ہے۔
‎معاشی ماہرین کا کہنا ہے کہ نجکاری کے پہلے مرحلے میں شیئرز کی منتقلی اور نئی سرمایہ کاری کی کامیاب تکمیل ملکی معیشت اور ہوا بازی کے شعبے کے لیے ایک اہم سنگ میل ہے۔ ان کے مطابق نجی سرمایہ کاری سے قومی ایئرلائن کی کارکردگی، مالی نظم و ضبط، انتظامی صلاحیت اور بین الاقوامی مسابقت میں بہتری آنے کے امکانات روشن ہوئے ہیں۔
‎ماہرین کا یہ بھی کہنا ہے کہ اگر آئندہ مراحل بھی شفاف انداز میں مکمل کیے گئے تو پی آئی اے کو مالی خسارے سے نکالنے، خدمات کے معیار کو بہتر بنانے اور مسافروں کا اعتماد بحال کرنے میں مدد مل سکتی ہے۔