حوثی تنظیم کا بحیرۂ احمر میں سعودی آئل ٹینکر پر میزائل حملے کا دعویٰ

یمن کی حوثی اکثریتی تنظیم انصار اللّٰہ نے بحیرۂ احمر میں ایک سعودی آئل ٹینکر پر بیلسٹک میزائلوں سے حملہ کرنے کا دعویٰ کیا ہے۔

حوثی گروپ کے ترجمان یحییٰ سریع نے ایک بیان میں کہا کہ سعودی آئل ٹینکر کو سعودی عرب کے ساحلی شہر ینبع کے قریب بحیرۂ احمر میں نشانہ بنایا گیا۔ ان کے مطابق یہ کارروائی سعودی بحری ناکہ بندی کے خلاف ردعمل کے طور پر کی گئی۔ترجمان نے مزید دعویٰ کیا کہ 22 جولائی سے نافذ سعودی ناکہ بندی کی خلاف ورزی کرنے والے 8 جہازوں پر حملے کیے گئے، جبکہ 29 جہازوں کو اپنا راستہ تبدیل کرنے پر مجبور کیا گیا۔یحییٰ سریع کا کہنا تھا کہ حوثی تنظیم سعودی عرب کی بحری ناکہ بندی کے خلاف اپنی کارروائیاں جاری رکھے گی۔ تاہم انہوں نے یہ واضح نہیں کیا کہ مبینہ حملہ آج کس وقت کیا گیا۔