یمن کی اہم المخا بندرگاہ پر حوثیوں کے میزائل حملوں کے بعد تجارتی اور بحری سرگرمیاں معطل کر دی گئی ہیں۔ بندرگاہ انتظامیہ کے مطابق حالیہ حملوں کے نتیجے میں بندرگاہ کو شدید نقصان پہنچا، جس کے بعد حفاظتی اقدامات کے تحت سرگرمیاں روک دی گئیں۔
بندرگاہ کے ڈائریکٹر نے بتایا کہ حملوں کے دوران المخا بندرگاہ کو 25 سے زائد میزائلوں سے نشانہ بنایا گیا۔ ان حملوں میں شہری، اقتصادی اور بحری تنصیبات کو بھی نقصان پہنچا۔
یمنی حکومت کے مطابق جمعے کے روز حوثیوں نے المخا بندرگاہ کی جانب 6 بیلسٹک میزائل فائر کیے۔ حملوں کے نتیجے میں بندرگاہ اور اطراف کے علاقوں میں شدید نقصان کی اطلاعات سامنے آئیں۔
بندرگاہ انتظامیہ کے مطابق حملوں میں 7 افراد ہلاک ہوئے جبکہ مالی نقصانات کا تخمینہ تقریباً ایک کروڑ 60 لاکھ ڈالر لگایا گیا ہے۔
المخا بندرگاہ بحیرہ احمر میں آبنائے باب المندب کے قریب واقع ہے، جو بحیرہ احمر اور خلیج عدن کو ملانے والا انتہائی اہم بحری راستہ ہے۔ اس علاقے میں کسی بھی قسم کی کشیدگی یا بندرگاہی سرگرمیوں کی معطلی عالمی تجارتی اور بحری نقل و حمل پر اثرات مرتب کر سکتی ہے۔
حوثیوں کے حملوں کے بعد یمن میں کشیدگی مزید بڑھ گئی ہے، جبکہ بندرگاہ پر ہونے والے نقصان اور تجارتی سرگرمیوں کی معطلی کے اثرات کا جائزہ لیا جا رہا ہے۔
المخا بندرگاہ پر حوثیوں کے میزائل حملے، تجارتی سرگرمیاں معطل
