‎بنگلادیش کے خلاف میچ میں حسین طلعت زخمی، اسپتال منتقل


پاکستان کے آل راؤنڈر حسین طلعت بنگلادیش کے خلاف دوسرے ایک روزہ میچ کے دوران فیلڈنگ کرتے ہوئے زخمی ہو گئے جس کے بعد انہیں فوری طور پر اسپتال منتقل کر دیا گیا۔
‎بنگلادیش کی اننگز کے دوران فیلڈنگ کرتے ہوئے حسین طلعت کندھے کی انجری کا شکار ہوئے۔ طبی عملے نے فوری طور پر میدان میں آ کر انہیں ابتدائی طبی امداد فراہم کی جس کے بعد انہیں اسٹریچر کے ذریعے میدان سے باہر لے جایا گیا۔
‎پاکستان کرکٹ بورڈ کے مطابق ٹیم کے میڈیکل اسٹاف نے ابتدائی معائنہ کیا تاہم مزید تفصیلی جانچ کے لیے کھلاڑی کو اسپتال منتقل کر دیا گیا ہے۔ ڈاکٹروں کے مکمل طبی معائنے کے بعد ہی انجری کی نوعیت اور شدت کے بارے میں حتمی فیصلہ کیا جائے گا۔
‎میچ میں پاکستان نے پہلے بیٹنگ کرتے ہوئے 47.3 اوورز میں 274 رنز بنائے اور بنگلادیش کو جیت کے لیے 275 رنز کا ہدف دیا۔ نوجوان بیٹر معاذ صداقت نے 46 گیندوں پر 75 رنز کی تیز رفتار اننگز کھیلی جس میں 6 چوکے اور 5 چھکے شامل تھے۔
‎سلمان علی آغا 64 رنز بنا کر رن آؤٹ ہوئے جبکہ محمد رضوان 44 رنز کے ساتھ نمایاں رہے۔ صاحبزادہ فرحان نے 31 رنز بنائے جبکہ شامل حسین 6، حسین طلعت 9 اور عبدالصمد 11 رنز بنا کر آؤٹ ہوئے۔
‎بنگلادیش کی جانب سے رشاد حسین نے 3 وکٹیں حاصل کیں جبکہ مہدی حسن نے 2 اور مستفیض الرحمان نے ایک کھلاڑی کو آؤٹ کیا۔