بھارت کی ریاست بہار میں ایک شادی کی تقریب اس وقت میدانِ جنگ کا منظر پیش کرنے لگی جب باراتیوں کو مٹن کے بجائے چکن پیش کیے جانے پر دونوں خاندانوں کے درمیان شدید جھگڑا ہوگیا، جس کے نتیجے میں 12 افراد زخمی ہوگئے۔
بھارتی میڈیا رپورٹس کے مطابق محمد عبداللہ عرف چاند کا نکاح جمعرات کی سہ پہر تقریباً 3 بجے پرامن ماحول میں انجام پایا۔ تاہم نکاح کے بعد جب باراتیوں کو کھانا پیش کیا گیا تو دولہا کی جانب سے بعض افراد نے اعتراض کیا کہ انہیں مٹن کھلانے کا وعدہ کیا گیا تھا، لیکن دعوت میں چکن پیش کیا گیا۔رپورٹس کے مطابق کھانے کے معاملے پر پہلے دونوں فریقوں کے درمیان تلخ کلامی ہوئی، جو دیکھتے ہی دیکھتے ہاتھا پائی اور پھر پُرتشدد تصادم میں تبدیل ہوگئی۔
بھارتی میڈیا کا کہنا ہے کہ دلہن والوں کے بعض افراد نے باراتیوں پر لاٹھیوں، لاتوں اور مکوں سے حملہ کردیا، جس سے شادی کی تقریب میں شدید افراتفری پھیل گئی۔سوشل میڈیا پر وائرل ہونے والی ویڈیوز میں متعدد افراد کو ایک دوسرے پر لاٹھیاں برساتے جبکہ کچھ افراد کو تلواریں لہراتے ہوئے بھی دیکھا جا سکتا ہے، جس سے تقریب میں خوف و ہراس پھیل گیا۔پولیس کے مطابق اطلاع ملنے پر اہلکار فوری طور پر موقع پر پہنچے اور صورتِ حال پر قابو پایا۔ جھگڑے میں زخمی ہونے والے 12 افراد کو طبی امداد کے لیے قریبی اسپتال منتقل کر دیا گیا، جبکہ واقعے کی وجوہات اور ذمہ داروں کے تعین کے لیے مزید تحقیقات جاری ہیں۔