پرتگال کے اسٹار فٹبالر کرسٹیانو رونالڈو نے اعلان کیا ہے کہ 2026 کا فیفا ورلڈ کپ ان کے بین الاقوامی کیریئر کا آخری عالمی ٹورنامنٹ ہوگا۔
اتوار کو اسپین کے خلاف ورلڈ کپ کے پری کوارٹر فائنل سے قبل میڈیا سے گفتگو کرتے ہوئے پانچ مرتبہ بیلن ڈی اور ایوارڈ جیتنے والے41 سالہ پرتگالی کپتان نے کہا کہ وہ اپنی قومی ٹیم کے ساتھ سفر کے آخری مرحلے سے بھرپور لطف اندوز ہونا چاہتے ہیں،’میں اس سفر سے جتنا ممکن ہو لطف اٹھانا چاہتا ہوں،یہ میرا آخری ورلڈ کپ ہوگا، لیکن مجھے امید ہے کہ کل میرا آخری میچ نہیں ہوگا۔‘
رونالڈو نے کہا کہ ان کے شاندار کیریئر کا فیصلہ صرف اس بات سے نہیں ہوگا کہ آیا وہ ورلڈ کپ جیت پاتے ہیں یا نہیں، انہوں نے 2 دہائیوں سے زائد عرصے میں فٹبال کو اپنا 100 فیصد نہیں بلکہ ’ایک ہزار فیصد‘ دیا ہے ایک دن بین الاقوامی فٹبال سے ریٹائرمنٹ ضرور آئے گی، لیکن جو بھی ہو، میں مطمئن ضمیر کے ساتھ میدان چھوڑوں گا کیونکہ میں نے فٹبال کے لیے اپنی ہر ممکن کوشش کی ہے۔
اپنی عمر پر ہونے والی تنقید کا جواب دیتے ہوئے رونالڈو نے کہا کہ وہ اب بھی اعلیٰ سطح پر بہترین کھیل پیش کر رہے ہیں میں فٹبال کسی مجبوری یا ضرورت کے تحت نہیں کھیلتا بلکہ اپنے شوق کی وجہ سے کھیلتا ہوں ہر دن سے لطف اٹھانا چاہیے، اور میں اس ورلڈ کپ میں 3 گول کر چکا ہوں، اس لیے میرا خیا ل ہے کہ میں ابھی بھی اچھی کارکردگی دکھا رہا ہوں،شائقین کی بے مثال محبت نے اس ورلڈ کپ کو ان کی زندگی کا یادگار ترین ٹورنامنٹ بنا دیا ہے۔
انہوں نے میڈیا کا بھی شکریہ ادا کرتے ہوئے کہا کہ گزشتہ برسوں میں ہونے والی تنقید نے انہیں مزید مضبوط انسان بنایا۔
رونالڈو اس ورلڈ کپ میں کئی ریکارڈ بھی اپنے نام کر چکے ہیں، ازبکستان کے خلاف 2 گول کرکے وہ ورلڈ کپ کے 6 مختلف ایڈیشنز میں گول کرنے والے تاریخ کے پہلے فٹبالر بن گئے،اس سے قبل وہ 2006، 2010، 2014، 2018 اور 2022 کے ورلڈ کپ میں بھی گول کر چکے تھے بعد ازاں کروشیا کے خلاف ناک آؤٹ مرحلے میں پینالٹی گول کرکے انہوں نے ورلڈ کپ کے ناک آؤٹ مرحلے میں اپنے کیریئر کا پہلا گول بھی اسکور کیا، موجودہ کلب کیریئر میں رونالڈو سعودی پرو لیگ کے کلب النصر کی نمائندگی کر رہے ہیں، جہاں وہ 2023 سے کھیل رہے ہیں۔