ایران کے صدر مسعود پزشکیان نے سپریم لیڈرآیت اللّٰہ مجتبیٰ خامنہ ای سے ملاقات کی ہے،ملاقات کو ایرانی صدر نے اعتماد، عاجزی اور خلوص سے بھرپور قرار دیا ہے۔
ایرانی میڈیا کے مطابق صدر مسعود پزشکیان کا کہنا ہے کہ سپریم لیڈر مجتبیٰ خامنہ ای سے ہونے والی ملاقات نہایت مثبت ماحول میں ہوئی، جہاں باہمی اعتماد اور اخلاص نمایاں تھا۔ انہوں نے کہا کہ آیت اللّٰہ مجتبیٰ خامنہ ای کے اندازِ گفتگو، سوچ اور عاجزانہ طرزِ عمل نے انہیں بے حد متاثر کیا۔ایرانی صدر نے مزید کہا کہ ملک کی اعلیٰ ترین قیادت کا اخلاقی رویہ اور انکساری انتظامی نظام کے لیے ایک عملی مثال ہے۔ ان کے مطابق سپریم لیڈر کے ساتھ ملاقات تقریباً ڈھائی گھنٹے تک جاری رہی، جس کے دوران مختلف قومی امور پر تبادلۂ خیال کیا گیا۔مسعود پزشکیان کا کہنا تھا کہ قیادت میں عاجزی، خلوص اور عوامی احساس ذمہ داری ہی مضبوط حکمرانی کی بنیاد بنتی ہے، اور یہی خصوصیات انہوں نے سپریم لیڈر کی شخصیت میں نمایاں طور پر محسوس کیں۔