نائب وزیراعظم اور وزیر خارجہ اسحاق ڈار نے ایرانی ہم منصب عباس عراقچی سے ٹیلی فونک رابطہ کیا، جس میں دونوں رہنماؤں نے خطے اور عالمی سطح پر ہونے والی اہم پیش رفت پر تبادلہ خیال کیا۔
گفتگو کے دوران خطے میں تیزی سے بدلتی ہوئی صورتحال اور امن و استحکام کے فروغ کے لیے جاری کوششوں پر بھی بات چیت کی گئی۔ دونوں وزرائے خارجہ نے موجودہ علاقائی حالات کے تناظر میں باہمی رابطے اور سفارتی کوششیں جاری رکھنے کی اہمیت پر تبادلہ خیال کیا۔
اسحاق ڈار نے عباس عراقچی کو پاکستان، سعودی عرب اور ترکیہ کے درمیان ہونے والے مکہ باہمی دفاعی معاہدے کے خدوخال سے بھی آگاہ کیا۔ پاکستان کے نائب وزیراعظم نے معاہدے کے حوالے سے ایران کے ساتھ پیدا ہونے والے کسی بھی خدشے کو دور کرنے اور اس کی نوعیت واضح کرنے کے لیے ایرانی ہم منصب کو تفصیلات فراہم کیں۔
پاکستان، ایران اور خطے کے دیگر ممالک کے درمیان حالیہ عرصے میں علاقائی سلامتی، امن اور سفارتی معاملات پر رابطوں میں اضافہ ہوا ہے۔ موجودہ صورتحال میں پاکستان کی جانب سے مختلف ممالک کے ساتھ رابطوں کو خطے میں کشیدگی کم کرنے اور باہمی اعتماد برقرار رکھنے کی کوششوں کا حصہ قرار دیا جا رہا ہے۔
مکہ باہمی دفاعی معاہدے میں پاکستان، سعودی عرب اور ترکیہ کی شمولیت کے بعد خطے میں اس کے ممکنہ اثرات پر بھی توجہ مرکوز ہے۔ اسلام آباد کا مؤقف ہے کہ علاقائی ممالک کے ساتھ تعاون کا مقصد امن، سلامتی اور استحکام کو فروغ دینا ہے۔
اسحاق ڈار اور عباس عراقچی کے درمیان رابطہ ایسے وقت میں ہوا ہے جب خطے کی مجموعی سیکیورٹی صورتحال انتہائی اہمیت اختیار کرچکی ہے۔ دونوں ممالک کے درمیان اعلیٰ سطح پر رابطے جاری رہنے سے علاقائی معاملات پر مشاورت کا عمل بھی آگے بڑھنے کی توقع ہے۔
اسحاق ڈار کا عباس عراقچی سے رابطہ، علاقائی صورتحال پر گفتگو
