وفاقی دارالحکومت اسلام آباد میں ایچ آئی وی کے پھیلاؤ میں تیزی سے اضافہ دیکھنے میں آیا ہے، جہاں سرکاری رپورٹ کے مطابق سال 2025 میں 498 کیسز رپورٹ ہوئے جبکہ جنوری 2025 سے مارچ 2026 تک مجموعی طور پر 618 نئے کیسز سامنے آئے ہیں۔
سرکاری اعداد و شمار کے مطابق شہر میں ہر ماہ اوسطاً 41 سے زائد افراد ایچ آئی وی سے متاثر ہوئے۔ رپورٹ میں بتایا گیا ہے کہ متاثرین میں نوجوان مردوں کی واضح اکثریت ہے اور 64 فیصد کیسز بالغ مردوں کے ہیں۔
حکام کے مطابق 618 نئے کیسز میں 397 مرد، 106 خواتین، 93 خواجہ سرا اور 22 بچے شامل ہیں، جس سے ظاہر ہوتا ہے کہ یہ مسئلہ معاشرے کے مختلف طبقات کو متاثر کر رہا ہے۔رپورٹ میں مزید بتایا گیا ہے کہ سال 2026 کی پہلی سہ ماہی میں 120 نئے کیسز رپورٹ ہوئے، جبکہ جولائی 2025 میں سب سے زیادہ 63 کیسز سامنے آئے۔ جون اور دسمبر 2025 میں کم ترین 31، 31 کیسز رپورٹ کیے گئے۔
ماہرین صحت کے مطابق نوجوان مردوں میں منشیات کے زیر اثر غیر محفوظ جنسی رویے ایچ آئی وی کے پھیلاؤ کی بڑی وجہ بن رہے ہیں۔ خاص طور پر آئس کے استعمال کے بعد غیر محفوظ تعلقات اس بیماری کے پھیلنے میں اہم کردار ادا کر رہے ہیں۔ماہرین نے خبردار کیا ہے کہ اگر فوری طور پر آگاہی مہم، بروقت ٹیسٹنگ، علاج اور احتیاطی اقدامات نہ کیے گئے تو صورتحال مزید سنگین ہو سکتی ہے۔ اندازوں کے مطابق پاکستان میں ایچ آئی وی سے متاثرہ افراد کی تعداد تقریباً ساڑھے 3 لاکھ تک پہنچ چکی ہے۔