تل ابیب: اسرائیل نے جنوبی لبنان میں اپنی فوجی موجودگی برقرار رکھنے کے مؤقف کا ایک بار پھر اعادہ کرتے ہوئے واضح کیا ہے کہ وہ اس معاملے پر کسی قسم کی پسپائی اختیار کرنے کا ارادہ نہیں رکھتا۔
غیر ملکی خبر رساں ادارے کے مطابق اسرائیلی وزیراعظم بنیامین نیتن یاہو کے قریبی ایک سینئر عہدیدار نے بتایا کہ جنوبی لبنان میں اسرائیلی فوج کی تعیناتی کے معاملے پر امریکا کے ساتھ سخت اور تفصیلی مذاکرات جاری ہیں۔
سینئر اسرائیلی عہدیدار کے مطابق اسرائیل جنوبی لبنان میں اپنی فوجی موجودگی کو قومی سلامتی کے لیے ضروری سمجھتا ہے اور اس معاملے پر اپنے مؤقف سے پیچھے ہٹنے کا کوئی ارادہ نہیں رکھتا۔
رپورٹ کے مطابق اسرائیلی حکومت کا مؤقف ہے کہ سرحدی علاقوں میں سیکیورٹی خدشات کے پیش نظر جنوبی لبنان میں فوجی موجودگی برقرار رکھنا ناگزیر ہے، جبکہ اس حوالے سے امریکا کے ساتھ مختلف سفارتی اور سیکیورٹی امور پر مسلسل رابطے جاری ہیں۔
دوسری جانب اس معاملے پر خطے کی صورتحال پر عالمی برادری بھی گہری نظر رکھے ہوئے ہے، کیونکہ جنوبی لبنان میں فوجی موجودگی کا مسئلہ مشرق وسطیٰ میں امن و استحکام سے جڑا ایک اہم معاملہ تصور کیا جاتا ہے۔
تاحال امریکا یا لبنان کی جانب سے اس حوالے سے کوئی باضابطہ ردعمل سامنے نہیں آیا، جبکہ مذاکرات کے نتائج پر علاقائی اور بین الاقوامی حلقوں کی نظریں مرکوز ہیں۔
اسرائیل جنوبی لبنان میں فوجی موجودگی برقرار رکھنے پر قائم
